Surxondaryoda IIB xodimi fuqaroni urib, og‘zini bog‘lab qo‘ydi
Holat yuzasidan rasmiylar tushuntirish berdi.
Ijtimoiy tarmoqlarda Surxondaryo viloyatining Muzrabot tumanida fuqaroga IIB xodimi tomonidan kuch ishlatilgani aks etgan video tarqaldi. Holat yuzasidan viloyat IIB rasmiy munosabat bildirdi.
Joriy yil 6-maydan 7-may kuniga o‘tar kechasi soat 01:10 larda Muzrabot tumani “Shaffof” mahallasida yashovchi fuqaro S.S ismli ayol tuman IIB navbatchilik qismiga qo‘ng‘iroq qilib, yashash uyiga notanish shaxs kelib ko‘p marta eshigini tepib janjal qilayotganligi haqidagi murojaat qilgan. Shu kuni tungi xizmatga jalb qilingan IIB xodimi M.A. chaqirilgan manzilga borganda fuqaro U.P. kuchli mastlik holatida IIB xodimining qonuniy talabini bajarmagani uchun uni tuman Tibbiyot markazida tashkil etilgan Alkogol mastlik holatidagi shaxslarga tibbiy yordam ko‘rsatish tumanlararo punktiga olib borgan. Tibbiyot birlashmasida ham davolanayotgan bemorlarning tinchligini buzib, qonuniy talablarga bo‘ysunmasdan, qo‘pol so‘zlar bilan haqoratlashda davom etgan. Shundan so‘ng U.P.ni tinchlantirish maqsadida IIB xodimi qatʼiy harakat qilgan.
“Xodimning harakatlari yuzasidan hozirda Surxondaryo viloyat IIB masʼullari tomonidan xizmat tekshiruvi o‘tkazilayotganligini maʼlum qilamiz”, — deyiladi xabarda.
