Aliyev Armaniston bilan kelishuv tuzilishi aniqligini aytdi
“Tinchlik muzokaralarining o‘tkazilishi Kavkazga uzoq muddatli tinchlik olib keladi deb umid qilamiz”, — deydi Ozarbayjon prezidenti.
Ozarbayjon va Armaniston o‘rtasida tinchlik shartnomasi imzolanishi aniq. Bu haqda Ozarbayjon prezidenti Ilhom Aliyev Vilnyusda Litva prezidenti Gitanas Nauseda bilan qo‘shma matbuot bayonotida maʼlum qildi.
“Men Litva prezidentiga Ozarbayjon va Armaniston o‘rtasidagi tinchlik muzokaralari haqida maʼlumot berdim. Tinchlik muzokaralarining o‘tkazilishi oxir-oqibat Kavkazga uzoq muddatli tinchlik olib keladi deb umid qilamiz… Tinchlik shartnomasi imzolanishi muqarrar deb hisoblaymiz va biz ushbu maqsadga erishish uchun konstruktiv saʼy-harakatlarni amalga oshirish uchun o‘z hissamizni qo‘shishga harakat qilmoqdamiz”, — dedi Aliyev.
Ozarbayjon prezidenti ushbu tinchlik shartnomasi barcha xalqaro norma va tamoyillarga mos kelishi kerakligini qo‘shimcha qildi.
Dushanba kuni ertalab Armaniston bosh vaziri Nikol Pashinyan Yerevan Ozarbayjon hududini, jumladan, Tog‘li Qorabog‘ni tan olishga tayyorligini maʼlum qilgandi. Lekin buning bir sharti borligini ham aytgan.
