Buxoro amirligi tarixiga oid adabiyotlarning elektron versiyasi Buxoro AKMga sovg‘a qilindi
Tarixiy adabiyotlarning asl nusxasi Rossiya milliy kutubxonasi fondida saqlanadi.
Joriy yil 24–26-may kunlari Buxoro shahrida anʼanaviy “Central Asia – 2023: Fan, taʼlim, madaniyat va biznesda Internet va axborot-kutubxona resurslari” XVI Xalqaro konferensiyasi va "Kitob va mutolaa jamiyat taraqqiyotidagi strategik resursi" II Hamdo‘stlik forumi bo‘lib o‘tishi maʼlum qilingandi.
Bugun Abu Ali ibn Sino Axborot-kutubxona markazida ushbu tadbirlar yuzasidan matbuot anjumani bo‘lib o‘tdi.
Tadbirda arxivariuslar, O‘zbekiston Milliy kutubxonasi, shuningdek, hududiy axborot-kutubxonalar rahbarlari va xodimlari, mahalliy OAV vakillari, xorijiy soha mutasaddilari ishtirok etdi.
Matbuot anjumanida Ozarbayjon Milliy kutubxonasi direktori Kerim Taxirov, Nazarboyev universiteti kutubxonasi direktori o‘rinbosari Pyotr Lapo, Rossiya Milliy kutubxonasi bosh direktori Vladimir Gronskiy so‘zga chiqib, Xalqaro konferensiya va Hamdo‘stlik forumining axborot-kutubxona, arxiv ishi hamda nashriyotlar faoliyatini yana-da rivojlantirishdagi ahamiyati, aholi, ayniqsa yoshlar o‘rtasida kitob mutolaasi va kitobxonlik madaniyatini oshirishda o‘zaro hamkorlikni kengaytirishda zaruriy maydon ekanligini taʼkidlashdi.
Anjuman doirasida Rossiya Milliy kutubxonasi va Abu Ali ibn Sino nomidagi Buxoro axborot-kutubxona markazi o‘rtasida o‘zaro hamkorlik memorandumi imzolandi.
Shuningdek, Rossiya milliy kutubxonasi fondida saqlanayotgan Buxoro amirligi tarixiga oid adabiyotlarning elektron versiyasi Buxoro AKMga sovg‘a qilindi hamda Xalqaro konferensiya doirasida ushbu adabiyotlarning taqdimoti bo‘lib o‘tishi maʼlum qilindi.
Eslatib o‘tamiz, ertaga “Central Asia – 2023: Fan, taʼlim, madaniyat va biznesda Internet va axborot-kutubxona resurslari” XVI Xalqaro konferensiyasi ertaga o‘z ishini boshlaydi.
Konferensiyaning 1-ish kunida “Axborot va kutubxona aʼlochisi” ko‘krak nishoni bilan taqdirlash marosimi bo‘lib o‘tadi.
