Qashqadaryoda bloger va fermerlar janjallashdi
Bloger fermerlar ishiga aralashib, ularni haqorat qilgan.
Qashqadaryo viloyatining Yakkabog‘ tumanida bloger hamda fermerlar o‘rtasida janjal chiqdi. Holat yuzasidan viloyat IIB maʼlumot berdi.
Kecha, 26 may kuni soat 22:30 larda Yakkabog‘ tumani Ibn Sino MFY hududida joylashgan Pilla mahsulotini saqlash omborxonasida pillalarni qabul qilib olish jarayoni olib borilayotgan vaqtda o‘zini bloger “Elmurodblog” deb tanishtirgan fuqaro O.E. pilla topshirish maskaniga borgan.
Shu yerda fermerlarning ishiga aralashib, ularga turli nomunosib savol javoblar qilishi oqibatida o‘rtalarida janjal kelib chiqqan. Ushbu jarayonda fuqaro O.E. fermerlarni haqorat qilgan.
Pilla yetishtiruvchi fermerlar fuqaro O.E.ning xatti-harakatlari yuzasidan Yakkabog‘ tuman ichki ishlar bo‘limiga murojaat qilgan.
Holat masʼul xodimlar tomonidan atroflicha o‘rganilib, fuqaro O.E.ga nisbatan Maʼmuriy javobgarlik to‘g‘risidagi kodeksning 183-moddasi hamda 198-moddasi 1-qismi bilan maʼmuriy bayonnoma rasmiylashtirilib, to‘plangan hujjatlar qonuniy to‘xtamga kelishlik uchun jinoyat ishlar bo‘yicha Yakkabog‘ tumani sudiga yuborilgan.
“Barcha voqea ishtirokchilarining harakatlariga huquqiy baho berilishi taʼminlanadi”, — deyiladi xabarda.
