Qamashida Damas daraga ag‘darilib ketdi
Oqibatda halok bo‘lgan va jarohatlanganlar bor.
Qashqadaryo viloyatining Qamashi tumanida Damas avtomashinasi ag‘darilib ketishi oqibatida 3 kishi halok bo‘ldi. Bu haqda Favqulodda vaziyatlar vazirligi xabar berdi.
Hodisa Qamashi tumani «Kattao‘ra» MFY “Kon” qishlog‘i hududi «Maydanak» va «Qiziltepa» yo‘nalishining 38-kilometrida yuz bergan. Mazkur yo‘nalishda harakatlanib ketayotgan Damas haydovchisi boshqaruvni yo‘qotib, daraga ag‘darilib ketgan.
Oqibatda avtomashinada bo‘lgan 3 nafar fuqaro voqea joyida vafot etgan, 3 nafar fuqaro turli darajadagi tan jarohatlar bilan Qamashi tumani shifoxonasiga yuborilgan.
Voqea joyiga viloyat FVB rahbariyati boshchiligida qutqaruvchilar, tuman hokimi va tegishli tashkilot vakillari yetib borib, qutqaruv ishlarni amalga oshirgan. Holat yuzasidan surishtiruv harakatlari olib borilmoqda.
