Farg‘onada hajga yuborish uchun 16 ming dollar olgan shaxs ushlandi
DXX bu bo‘yicha viloyatda tezkor tadbirlar o‘tkazgan.
Farg‘ona viloyatining Marg‘ilon shahrida haj ziyorati bilan bog‘liq firibgarlik holati aniqlandi. Bu haqda Davlat xavfsizlik xizmati xabar bermoqda.
Qayd etilishicha, Marg‘ilon shahrida faoliyat yurituvchi turistik firma rahbari ya.m. o‘zganing ishonchiga kirib, uni va tanishini haj ziyoratiga yuborish evaziga 16 ming AQSH dollari olgan vaqtida ashyoviy dalillar bilan ushlangan.
Marg‘ilon shahrida faoliyat yurituvchi boshqa bir turistik firma xodimi A.T. esa Qo‘shtepa tumanida yashovchi fuqaroga Haj–2023 vizasi rasmiylashtirib, haj ziyoratiga yuborish evaziga talab qilingan 10 ming AQSH dollaridan 4 ming AQSH dollarini oldindan olgan vaqtida qo‘lga tushgan.
Buvayda tumanida kuzatilgan holatda Andijon shahridagi turistik firma vakili M.J. Marg‘ilon shahrida yashovchi fuqaroning onasiga “Haj–2023” vizasi rasmiylashtirib, haj ziyoratiga yuborish evaziga talab qilingan 8500 AQSH dollaridan 3 ming AQSH dollarini oldindan olgan vaqtida ushlandi.
Hozirda mazkur shaxslarga nisbatan Jinoyat Kodeksining 25,168-moddasi (firibgarlik) bilan jinoyat ishlari qo‘zg‘atilib, tergov harakatlari olib borilmoqda.
