Jizzaxda salkam 1 tonna sifatsiz go‘sht aniqlandi
U Qashqadaryodan Toshkentga olib ketilayotgan bo‘lgan.
Jizzax viloyatining G‘allaorol tumanida 3 iyun kuni Qashqadaryodan Toshkentga sotish maqsadida olib ketilayotgan salkam 1 tonna sifatsiz go‘sht to‘xtatib qolindi. Bu haqda viloyat IIB xabar bermoqda.
G‘allaorol tumani hududidagi “Sangzor-15” yo‘l-patrul xizmati maskanida Qashqadaryo-Toshkent yo‘nalishida shubhali harakatlangan «Sobalt» to‘xtatilib, tekshirilgan. Tekshiruv davomida Qashqadaryo viloyati Chiroqchi tumanida yashovchi 1982 yilda tug‘ilgan fuqaro E.T. boshqaruvidagi avtoulovning yukxona va salonida go‘sht mahsulotlari veterinariya-sanitariya qoidalariga zid ravishda olib ketilayotgani aniqlangan. Haydovchi ushbu go‘sht mahsulotlariga oid hech qanday hujjatni taqdim eta olmagan. Ammo E.T. go‘shtni Qashqadaryo viloyatidan Toshkent shahriga sotish maqsadida olib ketayotganini maʼlum qilgan.
Tadbir jarayonida soha xodimlari tomonidan jami 820 kilogramm go‘sht mahsulotlari hujjatlashtirib olingan. Uning isteʼmolga yaroqliligini tekshirish maqsadida vaqtincha muzxonaga joylashtirilgan. Biroq laboratoriya tekshiruvida go‘sht mahsulotining isteʼmolga yaroqsizli oydinlashdi. Shundan so‘ng ushbu go‘sht mahsuloti tegishli tartibda yoqib yo‘q qilindi.
