Oila yarashdi: 2 nafar voyaga yetmagan farzandlar endi oila bag‘rida ulg‘ayadi
Termizda yana bir oila birlashdi
Yaqinda bir holat, taʼbir joiz bo‘lsa quvonarli voqea yuz berdi: Fuqarolik ishlari bo‘yicha Termiz tumanlararo sudining 2018 yil 25 oktyabrdagi qarori bilan qarzdor X.S.dan G.S. foydasiga ikki nafar voyaga yetmagan farzandining moddiy taʼminoti uchun har oyda ish haqi va boshqa daromadlarining 1/3 qismi miqdorida aliment undirish belgilangan bo‘lsada, aliment pullarini to‘lashdan qasddan bo‘yin tovlab kelgan.
Natijada X.S. jami 14 034 847 so‘m aliment pullarini to‘lashdan bo‘yin tovlab kelganligi uchun jinoyat ishlari bo‘yicha Termiz shahar sudining 2022 yil 22 sentabrdagi qaroriga asosan MJtKning 474-moddasi 1-qismida ko‘rsatilgan huquqbuzarlikni sodir etganlikda aybdor deb topilib, tayinlangan 15 sutka maʼmuriy qamoq jazosini o‘tab chiqadi. Biroq bundan u o‘ziga to‘g‘ri xulosa chiqarmasdan 2022 yil 1 avgustdan 2023 yil 1 fevralga qadar 7 070 118 so‘m aliment pullarini ham to‘lamasdan kelgan.
Buni qarangki, sud majlisida jabrlanuvchi G.S. dastlabki tergov davrida bergan ko‘rsatmalarini tasdiqlab, yarashuv to‘g‘risidagi ariza bilan murojaat qilib, sudlanuvchi turmush o‘rtog‘i X.S. bilan yarashganligini, yetkazilgan moddiy va maʼnaviy zararni to‘liq bartaraf etganligini, yarashuv ixtiyoriy ravishda biron-bir tazyiqlar bo‘lmaganligi, ayni paytda unga nisbatan hech qanday daʼvosi yo‘qligini bildirdi.
Eng quvonarlisi, suddan yarashuvni tasdiqlab, sudlanuvchiga nisbatan bo‘lgan jinoyat ishini harakatdan tugatishni so‘radi. O‘z o‘rnida X.S. ham o‘z aybiga to‘liq iqror bo‘lib, qilgan qilmishidan chin ko‘ngildan pushaymonligi, jabrlanuvchidan kechirim so‘rab, unga yetkazilgan zararni bartaraf etganligini, o‘zaro ixtiyoriy ravishda yarashib olganligini inobatga olib, suddan yarashuvni tasdiqlab, unga nisbatan bo‘lgan jinoyat ishini harakatdan tugatishni so‘rab ko‘rsatuv berdi.
Muhimi, “oila” degan muqaddas qo‘rg‘on saqlab qolindi. Ota-ona xato-kamchiliklarini tushunib yetishdi, farzandlar endi kemtiklikdan jovdiramaydigan bo‘ldi, bir xonadon jamiyatga qaytdi. Shu bois, O‘zbekiston Respublikasi JK 122-moddasining 1-qismi bilan ayblangan S.X.ga nisbatan jinoyat ishi yarashganligi munosabati bilan tugatildi.
Sherzod Yuldashev,
Jinoyat ishlari buyicha Termiz shahar sudining sudyasi
