Samarqandda ayolning suratini tarqatmaslik evaziga bitta iPhone va 6500 dollar talab qilgan erkak ushlandi
U endi 8 yilgacha ozodlikdan mahrum qilinishi mumkin.
Samarqand viloyatida Odnoklassniki ijtimoiy tarmog‘ida tovlamachilik sodir etgan shaxs ushlandi. Bu haqda viloyat IIB axborot xizmati xabar bermoqda.
Samarqand shahrida yashovchi 36 yoshli Z.N. ariza bilan murojaat qilib, o‘zining Odnoklassniki ijtimoiy tarmog‘ida joylashtirgan fotosuratlarini “nomaʼlum shaxs” yuklab olib, uyatli rasmlari borligini aytib pul talab qilayotganligini maʼlum qilgan.
Olib borilgan tezkor-surishtiruv ishlari natijasida pullarni o‘zlashtirgan shaxs muqaddam sudlangan Samarqand shahrida yashovchi 35 yoshli T.U. ekanligi aniqlangan.
T.U. Odnoklassniki ijtimoiy tarmog‘ida Z.N. joylashtirgan fotosuratlarini yuklab olib, ularga maxsus dasturlardan foydalanib ishlov berib, ushbu uyatli fotosuratlarni, ijtimoiy tarmoqlarga tarqatib yubormaslik evaziga 6 500 AQSH dollari, bir dona Apple iPhone 13 Pro va bir dona erkaklar tilla zanjiri talab qilganligi maʼlum bo‘ldi.
Mazkur holat yuzasidan, T.U.ga nisbatan Jinoyat kodeksining 168-modda 3-qismi bilan jinoyat ishi qo‘zg‘atilib, tergov harakatlari olib borilmoqda.
Qonunga muvofiq, T.U. tomonidan sodir etilgan jinoiy harakatlar uchun 5 yildan 8 yilgacha ozodlikdan mahrum qilish jazosi nazarda tutilgan.
