Xivada Xalqaro kimyo olimpiadasining ochilish marosimi o’tkazildi
Olimpiada 11-17 iyun kunlari bo’lib o’tishi rejalashtirilgan.
Bugun, 12-iyun kuni Maktabgacha va maktab ta’limi vazirligi tomonidan Xiva shahrida tashkil etilayotgan Abu Rayhon Beruniy nomidagi Xalqaro kimyo olimpiadasining ochilish marosimi bo‘lib o‘tdi.
Unda Maktabgacha va maktab ta’limi vazirligi, Xorazm viloyati hokimligi, mutasaddi tashkilotlar, shuningdek, olimpiadada ishtirok etuvchi xorijiy davlatlar o‘quvchi-yoshlari qatnashdi.
O‘ziga xos bayram shukuhiga ulanib ketgan tadbirda so‘zga chiqqanlar mazkur musobaqaning ahamiyatli jihatlari hamda uning ishtirokchi o‘quvchilar hayotidagi o‘rni xususida atroflicha fikr bildirib o‘tishdi.
Xususan, tadbirda o‘z fikrlari bilan o‘rtoqlashgan germaniyalik professor Joxann Plank buyuk bobokalonimiz Abu Rayhon Beruniy ilmiy me’rosi va faoliyati bugungi kunga qadar dunyo olimlari tomonidan katta qiziqish bilan o‘rganib kelinayotganligini alohida ta’kidladi.
Tadbir davomida ishtirokchi davlatlarning tanishtiruv marosimi tashkil etildi. O‘zaro do‘stona va quvnoq tarzda davom etgan olimpiadaning ochilish marosimi diltortar kuy-qo‘shiqlar va o‘quvchi-yoshlarning beg‘ubor raqs davralariga ulanib ketdi.
