Marmaris Turkiyaning eng mashhur sayyohlik markazlaridan biridir
Marmaris — ikki dengizni bog‘lagan port shahar.
Marmaris o‘zining tabiiy go‘zalligi, uzun qirg‘oq chizig‘i, qarag‘ay daraxtlari bilan qoplangan tepaliklardan ajoyib manzaralari, sohillari, qadimiy shaharlari, kema portlari bilan Mug‘laning eng mashhur sayyohlik markazlaridan biridir.
Marmaris ikki dengizni bog‘lab turgan geografik joylashuvi bilan mintaqada ming yillar davomida hukmronlik qilgan ko‘plab sivilizatsiyalar uchun asosiy port vazifasini bajarib kelgan. Bu muhim port shaharning miloddan avvalgi 3400 yillariga tegishli qadimiy xarobalarini Marmaris shahrining shimolidagi Asartepada ko‘rish mumkin.
Marmaris dam olishni, tabiiy go‘zalliklardan zavqlanishni va mintaqaning boy tarixini kashf qilishni xohlaydiganlar, shuningdek, feruza rangli dengiz va oltindek sariq qumlardan bahra olib, suv va quruqlikdagi sport turlarini sinab ko‘rmoqchi bo‘lganlar uchun mukammal manzildir. Quyida sayyohlar uchun shaharning diqqatga sazovor joylari haqida maʼlumot berilgan.
Marmaris qalʼasi
Marmaris shahrining markazi qalʼa va port mintaqada joylashgan. Bugungi kunda muzey bo‘lgan o‘rta asr qalʼasi, port atrofidagi butun maydonni yuqoridan ko‘rish imkonini va eski shaharning arxitekturasini ko‘zdan kechirish zavqini taqdim etadi. Ushbu tarixiy binolarning aksariyati yaxshi saqlanib qolgan. Arxeologiya muzeyi sifatida foydalanilgan «Marmaris qalʼasi» Marmarisdagi yagona muzeydir. Ushbu muzeyda Ellinistik, Rim va Vizantiya davriga oid «ikki tutqichli ko‘za bo‘laklari» bilan birga Knidos, Hisaro‘nu va Burgaz mintaqalarida olib borilgan qazishmalarda topilgan sopol idishlar, shisha idishlar, tangalar va bezak buyumlari namoyish etiladi.
Marmaris tarixiy bozori
Marmaris tarixiy bozori o‘tmishdan hozirgi kungacha o‘zining gavjumligi bilan tanilib kelmoqda. Bozorda esdalik sovg‘alari, kiyim-kechak, ziravorlar va Marmarisga xos mahalliy hunarmandchilik buyumlari tashrif buyuruvchilarga taklif qilinadigan ko‘plab do‘konlar mavjud.
Lorima qadimiy shahri
Lorima qadimiy shahri Bozburun yarim orolining janubi-g‘arbiy qismida joylashgan Bozukkale qishlog‘ida insho etilgan. Shahardagi eng ko‘zga ko‘ringan inshoot - antik qalʼadir. Bozukkale bandargohi kruiz qayiqlari va yaxtalar uchun asosiy to‘xtab dam olish nuqtasi bo‘lib, u yerda tushdan keyin Lorimaning qadimiy devorlari orasida ajoyib manzaraning guvohi bo‘lishi mumkin.
Yaxta portlari (Marinalar)
Marmaris Janubiy Egeydagi eng katta va eng zamonaviy portlardan biridir. Bu port qadimdan to hozirgacha o‘z qiymatini yo‘qotmagan. Mazkur zamonaviy va katta port hozirda hashamatli yaxtalar va qayiqlarning tez-tez tashrif buyuradigan manzili hisoblanadi. Sohil bo‘ylab orol va yarimorollarni ziyorat qilish uchun ijaraga olinadigan qayiqlar ham mavjud.
Jannat oroli
Jannat oroli Marmaris shahri yaqinidagi yarim orolda joylashgan. Qarag‘ay o‘rmonlari bilan qoplangan orolda unutilmas suvga sho‘ng‘ish tajribasini taqdim etadigan qirg‘oq chizig‘i mavjud. Shuning uchun ham bu yer qayiq sayohatlari uchun juda mashhur sanaladi. Orolning landshafti quyosh botishini kuzatadiganlar va ushbu onlarni fotoapparatga muhrlaydiganlar uchun unutilmas manzarani taqdim etadi. Orolga kelib, kunni faqat suzish hamda quyoshda toblanish bilan o‘tkazish mumkin.
Yalanji bo‘g‘oz
Marmarisdan qaralganda, dengizning bo‘g‘ozga o‘xshash qismi Jannat orolini materik bilan bog‘laydi. Shahar markazidan atigi 8 kilometr uzoqlikdagi bo‘g‘ozga mikroavtobuslarda borish mumkin. Bosforga yetib borgandan so‘ng, u yerdan Jannat oroli va Nimara g‘origa qarab piyoda yursa bo‘ladi. Yalanji bo‘g‘oz o‘tmishda port sifatida foydalanilgan. Egey va O‘rta Yer dengizining eng nufuzli porti bo‘lgan Marmaris porti Yalanji bo‘g‘ozda joylashgan bo‘lib, ayni paytda yetakchi yaxta va turizm markazlaridan biri hisoblanadi.
Bo‘zburun
Bo‘zburun Marmarisdan 45 kilometr janubi-g‘arbda joylashgan sayyohlik markazidir. Bu, ayniqsa, yaxta turizmi uchun mashhur dam olish maskani. Bu yerda hayot juda sokin va atrof-muhit nisbatan kam sonli aholi bilan o‘ralgani sababli juda tinchdir. Ushbu kichik shaharchada ko‘plab butik mehmonxonalar, pansionatlar va restoranlar mavjud.
Turunch ko‘rfazi
Marmarisning eng mashhur ko‘rfazlaridan biri Turunch akvariumni eslatuvchi sof feruza suvlariga ega. Dengizga yaqin joyda zamonaviy va anʼanaviy restoranlar, sayr qilish yo‘laklari va hashamatli butik mehmonxonalarni ko‘rish mumkin. Turunchga mashina yoki qayiqda boriladi.
Amos ko‘rfazi
Turunch va Kumlubuk oralig‘ida joylashgan Amos ko‘rfazi tiniq dengizi bilan dong taratgan. Ko‘zlardan uzoq bu hududda jamoat transporti yo‘q, u yerga faqat mashina yoki qayiqda borishi mumkin. Amos qadimiy shahar xarobalarini ham ko‘rish mumkin bo‘lgan bu manzilda suv ostiga sayohat qilish unutilmas xotira bo‘lib qoladi.
Bordubet ko‘rfazi
Qarag‘ay o‘rmonlari bilan o‘ralgan yana bir ko‘rfaz - “Bordubet”dir. Bu yerda qushlarning xilma-xilligi hukmron bo‘lgan ko‘rfazda ularning sayrashi bilan dam olish uchun yoqimli sohil qidirish uchun uzoqqa borishning hojati yo‘q! Qishloqda bungalov va chodirda yashash imkoniyatlari mavjud. Sokin ko‘rfaz bo‘lgan Bordubetda qayiq yoki kanoeda sayr qilish, baliq ovlashingiz yoki velosipedga minish mumkin.
