Rossiya–Ukraina urushida o‘zbekistonliklar ham halok bo‘lgani aytilmoqda
Hozirga qadar 100 ga yaqin Markaziy Osiyo fuqarolari jang maydonida halok bo‘lgan.
2022-yil 24-fevral kuni Rossiyaning Ukrainaga qarshi bosqinchilik urushi boshlanganidan buyon kamida 93 nafar Markaziy Osiyo fuqarolari, jumladan, 34 nafar o‘zbekistonlik jang maydonida halok bo‘ldi. Bu haqda BBC Rus xizmati jurnalist surishtiruviga tayanib xabar berdi.
Qirg‘izistondan 19 nafar, Tojikistondan 40 nafar fuqaro harbiy harakatlarda o‘lim topgan. Ularning barchasi Rossiya tomonida jang qilgan.
Hozirga qadar jang maydonida halok bo‘lgani aniqlangan 93 nafar Markaziy Osiyo fuqarolarining asosiy qismi «Vagner» xususiy harbiy shirkati orqali jazoni o‘tish muassasalaridan urushga safarbar qilingan. Qolganlar esa harbiy sifatida turli bo‘linmalarda xizmat qilgan.
BBC surishtiruviga ko‘ra, Ukrainada urush boshlanganidan keyin og‘ir mehnat sharoitida kamtarona maoshga qanoat qilib ishlashga odatlangan markaziy osiyolik mehnat muhojirlariga jang maydonida ham talab oshgan. Ular handaq (okop) qazish va vayron bo‘lgan hududlarni qayta tiklashga jalb etilgan. Qamoqxonadan urushga yuborilgan sobiq mahkumlar – «Vagner» shirkati yollanma askarlari esa harbiy harakatlarda bevosita qatnashgan.
Marhumlarning yaqinlari urushda halok bo‘lgan farzandlarining hatto jasadini ham ololmayotganidan shikoyat qilgan.
«Alam qiladigani – farzandim halok bo‘lgani haqida hech kim xabar bermadi, haligacha jimjitlik! Bolajonim begona yurtda tuproqqa qo‘yilgani qalbimni o‘rtamoqda. O‘g‘lim yonimda bo‘lsin deyman. Tirik holda bag‘rimga qaytmadi, jillaqursa jasadini keltirib berishsin», – degan jangda halok bo‘lgan askarlardan birining onasi.
Avvalroq O‘zbekiston Davlat xavfsizlik xizmati Rossiya qamoqxonasidan Ukrainadagi urushga yuborilgan 23 yoshli yurtdoshimiz Sh.Tojiboyev halok bo‘lgani haqida xabar bergan edi. Sh.Tojiboyev jasadining yarmi (oyoqlarsiz) O‘zbekistonga olib kelingandi.
Jamoat faollari bir necha oydan buyon Rossiyada mehnat qilayotgan Markaziy Osiyo, jumladan, O‘zbekiston vatandoshlarini Ukraina urushiga yuborishga qaratilgan targ‘ibot kuchayganidan ogohlantirmoqda.
Xususan, 31 may kuni «Spravedlivaya Rossiya» partiyasi rahbari Sergey Mironov Dumadagi chiqishida urushda Rossiya tomonida turib qatnashmoqchi bo‘lgan O‘zbekiston, Qozog‘iston va Qirg‘iziston fuqarolarining o‘z davlatida jinoiy javobgarlikka tortilayotganidan yozg‘irgan edi. Rus siyosatchisining daʼvosiga javob bergan “Yuksalish” UMH raisi Bobur Bekmurodov unga o‘z “ishlari” bilan shug‘ullanishni maslahat bergan.
