Rossiya O‘zbekistonga qancha gaz yetkazib berishi maʼlum bo‘ldi
“Gazprom”dan gaz sotib olish O‘zbekistonga o‘z ehtiyojlarini to‘liq qondirishga yordam berishi mumkin.
Sankt-Peterburg Xalqaro iqtisodiy forumida Rossiya gazini O‘zbekistonga yetkazib berish bo‘yicha shartnoma va respublika gaz uzatish tizimini Rossiya gazini qabul qilishga tayyorlash bo‘yicha "Yo‘l xaritasi" imzolangandi. Unga ko‘ra, Rossiya gazini O‘zbekistonga Qozog‘iston hududi orqali eksport qilish 2023 yilning to‘rtinchi choragidan boshlanishi rejalashtirilmoqda.
“Kommersant”ning yozishicha, “Gazprom” "Markaziy Osiyo – Markaz" quvuri orqali O‘zbekistonga yiliga 6 milliard kub metr yoki kuniga taxminan 18 million kubometrga yaqin gaz yetkazib berishi kutilmoqda. Qayd etilishicha, gaz yetkazib berish hajmlari har yili yangilanadi.
Tahlilchilarning fikricha, “Gazprom”dan 6 milliard kub metr sotib olish O‘zbekistonga o‘z ehtiyojlarini qondirish imkonini beradi, biroq bu Xitoyga gaz eksporti bo‘yicha shartnomani to‘liq bajarish uchun yetarli bo‘lmasligi mumkin.
