Samarqandda 36 yoshli erkak 3 nafar farzandini pichoqlab o‘ldirdi
Ayblanuvchi turmush o‘rtog‘i bilan telefonda kelib chiqqan janjal tufayli shu ishni qilgan.
Samarqandda 36 yoshli erkak Isroil davlatida ishlab kelayotgan turmush o‘rtog‘i bilan telefon orqali kelib chiqqan o‘zaro kelishmovchiligi natijasida jahl qilib, undan o‘ch olish maqsadida 3 nafar voyaga yetmagan farzandini (2 ta qiz va 1 ta o‘g‘il) oshxona pichog‘i bilan qasddan o‘ldirdi.
Bosh prokuratura matbuot xizmatining xabar berishicha, shundan so‘ng erkak ushbu oshxona pichog‘i bilan tanasining chap ko‘krak sohasiga bir marotaba urib o‘ziga tan jarohati yetkazgan. Hozirda u shifoxonaning jonlantirish bo‘limiga yotqizilgan.
Mazkur holat yuzasidan Jinoyat kodeksining 97-moddasi (Qasddan odam o‘ldirish) bilan jinoyat ishi qo‘zg‘atilib, tergov harakatlari olib borilmoqda.
