Jarimalarni to‘lashda fuqarolarga yengillik berilishi mumkin
Kiritilayotgan o‘zgarish bilan jarima miqdori ijro hujjatida undirilishi belgilangan summadan yuqori bo‘lishi mumkin emasligi belgilanmoqda.
Senatning sud-huquq masalalari va korrupsiyaga qarshi kurashish qo‘mitasining navbatdagi majlisi bo‘lib o‘tdi. Unda "Normativ-huquqiy hujjatlarning va ular loyihalarining korrupsiyaga qarshi ekspertizasi to‘g‘risida"gi qonun hamda "Ijro hujjatlarini ijro etmaganlik uchun solinadigan maʼmuriy jarima miqdorini belgilash tartibi takomillashtirilishi munosabati bilan O‘zbekiston Respublikasining Maʼmuriy javobgarlik to‘g‘risidagi kodeksiga o‘zgartirishlar va qo‘shimcha kiritish haqida"gi qonun muhokama qilindi.
Senatorlarning fikricha, qonunni qabul qilish uchun qator omillar yuzaga kelgan. Jumladan, amalda undirilishi lozim bo‘lgan qarzdorlik 100 ming so‘m bo‘lsa-yu, ushbu jarima miqdori o‘z vaqtida to‘lanmasa, Majburiy ijro byurosi tomonidan ushbu summaga nisbatan bir necha marta yuqori jarima belgilanishi mumkin. Bu hol tabiiyki, fuqarolarning to‘lov qobiliyatiga salbiy taʼsir ko‘rsatib, ularning noroziligini keltirib chiqaradi.
Shuningdek, belgilangan jarimalarni o‘z vaqtida to‘lamaganlik uchun bugungi kunda barcha ijrochilarga maʼmuriy jarimaga tortish vakolati mavjud. Bu holatlar ham turli suiisteʼmolchilik va aholi noroziligiga sabab bo‘lmoqda. Ushbu qonun bilan Maʼmuriy javobgarlik to‘g‘risidagi kodeksning 1981-moddasiga jarimaning miqdori ijro hujjatida undirilishi belgilangan summadan yuqori bo‘lishi mumkin emasligi haqida norma kiritilmoqda.
"Eng asosiysi, MJtKning tegishli moddalarida nazarda tutilgan maʼmuriy huquqbuzarliklar to‘g‘risidagi ishlarni ko‘rib chiqishga hamda maʼmuriy jazo qo‘llashga vakolatli bo‘lgan shaxslar doirasi qisqartirilib, O‘zbekiston Respublikasining Bosh davlat ijrochisi, Qoraqalpog‘iston Respublikasi, viloyatlar va Toshkent shahrining bosh davlat ijrochilari, ularning o‘rinbosarlari, shuningdek Majburiy ijro byurosining tuman (shahar) bo‘limlari boshliqlari haqli ekanligi to‘g‘risidagi o‘zgartirish kiritilmoqda", — deyiladi xabarda.
Senatorlarning qayd etilishicha, mazkur qonun fuqarolarning jarimalarni to‘lashda ularga yengilliklar berilishiga xizmat qiladi.
