Kredit evaziga iPhone 17 Pro Max: Farg‘onada hokim yordamchisi ushlandi
U fuqaroga bankdagi tanishlari orqali kredit chiqarib berishni va’da qilgan.
Farg‘ona viloyatining Beshariq tumanida hokim yordamchisi 150 mln so‘mlik kredit ajratilishiga yordam berish evaziga pora olayotganida ushlandi. Bu haqda Bosh prokuratura huzuridagi Departament xabar berdi.
Ma’lum qilinishicha, Departamentning Beshariq tumani bo‘limi va boshqa huquqni muhofaza qiluvchi organlar xodimlari hamkorligida tezkor tadbir o‘tkazilgan.
Unda “Qo‘rg‘oncha” mahallasida hokim yordamchisi lavozimida ishlovchi D.X. fuqaro M.Y.ga tijorat bankida ishlaydigan tanishlari orqali 150 mln so‘m miqdorida kredit ajratilishiga yordam berishni va’da qilgan. Buning evaziga u fuqarodan “iPhone 17 Pro Max” rusumli telefon olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilgan. Hozirda tergov harakatlari olib borilmoqda.
