Prezident Navoiy viloyatining sobiq hokimi vafoti munosabati bilan hamdardlik bildirdi
Bahriddin Ro‘ziyev Navoiy viloyatining ijtimoiy-iqtisodiy rivoji, “Navoiy” erkin industrial-iqtisodiy zonasi va xalqaro logistika markazini tashkil etish ishlariga hissa qo‘shgan.
Davlat va jamoat arbobi, Navoiy viloyatining sobiq hokimi, mehnat faxriysi Bahriddin Murtazayevich Ro‘ziyev 11-noyabr kuni 76 yoshida vafot etdi. Bu munosabat bilan O‘zbekiston Prezidenti hamdardlik bildirdi.
Bahriddin Ro‘ziyev 1950-yil 23-avgustda Qashqadaryo viloyatining Chiroqchi tumanida tug‘ilgan. Mehnat faoliyatini Karmana tumani yo‘l qurilishi birlashmasida avtochilangar sifatida boshlagan. Ishlab chiqarishdan ajralmagan holda Toshkent politexnika institutida muhandis-mexanik mutaxassisligi bo‘yicha tahsil olgan. Keyinchalik Moskva ijtimoiy fanlar akademiyasida ham o‘qigan.
U Navoiy viloyatida yoshlar tashkilotlari va turli boshqaruv idoralarida mas’ul lavozimlarda ishlagan. Mustaqillikning dastlabki yillarida Navoiy viloyati gazlashtirish boshqarmasi va hududiy kommunal foydalanish boshqarmasiga rahbarlik qilgan, Konimex tumani hokimi lavozimida faoliyat yuritgan.
2002-yilda Navoiy viloyati hokimi etib tayinlangan Bahriddin Ro‘ziyev hududning ijtimoiy-iqtisodiy rivojlanishi, sanoat va ishlab chiqarish sohalarini kengaytirish, investitsiyalar jalb qilish, fermerlik harakatini shakllantirish hamda aholini ijtimoiy himoya qilish yo‘nalishlarida faoliyat olib borgan.
U, ayniqsa, “Navoiy” erkin industrial-iqtisodiy zonasini tashkil etish va Navoiy xalqaro aeroporti negizida xalqaro logistika markazini barpo qilish ishlariga katta hissa qo‘shgan.
Keyingi yillarda faxriylar tashkiloti a’zosi sifatida ham jamoat ishlarida faol qatnashgan. Boy tajribasi va maslahatlari bilan turli sohalarni rivojlantirish, yosh kadrlarni tarbiyalash hamda ularni vatanparvarlik ruhida kamol toptirishga qaratilgan tadbirlarda ishtirok etgan.
Prezident hamdardlik murojaatida Bahriddin Ro‘ziyevni taniqli davlat va jamoat arbobi, samimiy va kamtarin inson, yoshlarning mehribon ustozi sifatida e’tirof etib, uning xotirasi qalblarda hamisha saqlanib qolishini ta’kidladi.
