Ayrim mutaxassisliklarga qabul faqat davlat granti asosida amalga oshiriladi

 

Prezident qarori bilan ayrim klinik ordinatura va magistratura mutaxassisliklariga qabul faqat davlat granti asosida amalga oshiriladi. Qarorga ko‘ra, aholi ruhiy salomatligini muhofaza qilish xizmatini tubdan takomillashtirish maqsadida, jumladan:

 

• ixtisoslashtirilgan psixiatriya va narkologiya yordamini ko‘rsatishning yagona vertikal boshqaruv tizimi joriy etiladi;

• birlamchi bo‘g‘in tibbiyot muassasalariga ruhiy salomatlikni muhofaza qilish xizmatlari integratsiya qilinadi;

• ruhiy holati buzilgan shaxslar dori vositalari bilan ehtiyojga ko‘ra to‘liq taʼminlanadi;

• aholi, ayniqsa, bolalar va o‘smir yoshlarning ruhiy salomatligi mustahkamlanadi.

 

Bundan tashqari, 1-iyuldan Respublika ixtisoslashtirilgan narkologiya ilmiy-amaliy tibbiyot markazi Respublika ixtisoslashtirilgan ruhiy salomatlik ilmiy-amaliy tibbiyot markaziga aylantiriladi. Shuningdek, 2023-yil 1-avgustdan quyidagilar joriy etiladi: 

 

• tuman (shahar) ko‘p tarmoqli markaziy poliklinikalarida – tibbiy psixolog;

• statsionar o‘ringa ega bo‘lmagan ruhiy-asab kasalliklari dispanserlari va tarkibida dispanser mavjud bo‘lgan ruhiy kasalliklar shifoxonalarida – suisidolog;

• statsionar o‘ringa ega bo‘lgan ruhiy-asab kasalliklari dispanserlari va ruhiy kasalliklar shifoxonalarida – qabul bo‘limi shifokori, navbatchi psixiatr, tibbiy psixolog yoki psixoterapevt shtatlari.

 

Maʼlum qilinishicha, 2023/2024-o‘quv yilidan “Psixiatriya”, "Tibbiy psixologiya" va “Narkologiya” klinik ordinatura va magistratura mutaxassisliklariga qabul faqat davlat granti asosida umumiy qabul parametrlari doirasida amalga oshiriladi.

 

Shuningdek, qaror bilan 1-iyuldan tuman (shahar) ko‘p tarmoqli markaziy poliklinikalaridagi psixiatr hamda psixiatriya davolash muassasalaridagi psixiatr, tibbiy psixolog, psixoterapevt hamda suitsidologlarning lavozim maoshiga ustama miqdori 25 foizdan 50 foizga oshiriladi.