Buxoroda IELTS sertifikatini qalbakilashtirgan o‘qituvchi aniqlandi
Soxta hujjat bilan unga 33 mln ustama haqi yozilgan.
Buxoro shahrida IELTS sertifikatini soxtalashtirib, ustama haqi olgan o‘qituvchi aniqlandi. Bu haqda viloyat IIB xabar bermoqda.
Buxoro muhandislik-texnologiya instituti rektori buyrug‘i bilan S1 darajadagi IELTS sertifikati borligi sababli xorijiy tillar kafedrasi o‘qituvchisi A.M.ning oylik maoshiga qo‘shimcha 50 foiz ustama to‘lab kelingan. Ushbu sertifikatda A.M.ning emas, balki boshqa nomaʼlum shaxsning fotosurati mavjudligi sababli uning haqqoniyligini tekshirish maqsadida Britaniya Kengashining O‘zbekistondagi vakolatxonasiga so‘rov jo‘natilgan. Britaniya Kengashi vakolatxonasi direktorining tegishli xatida ushu sertifikat imtihonda qoida buzilishi, yaʼni nomzod o‘rniga boshqa shaxsning yordamidan foydalanganlik holati bo‘yicha o‘tkazilgan tekshiruv natijasiga ko‘ra bekor qilinganligi ko‘rsatilgan.
Shuningdek, Kengash tekshiruv natijalariga ko‘ra A.M.ga 2023 yil 26 sentyabrga qadar IELTS imtihonlarini qayta topshirish taqiqlangan.
Buxoro Muhandislik texnologiya institutining taqdim qilgan maʼlumotiga ko‘ra, 003241-sonli IELTS sertifikati asosida A.M.ga 2021 yilning dekabr oyidan 2022 yilning sentyabr oyiga qadar jami 33 mln 276 ming so‘m qo‘shimcha ustama hisoblanib, to‘lab berilgan.
Mazkur holat yuzasidan O‘zbekiston Respublikasi Jinoyat Kodeksining 168-moddasi 2-qismi bilan jinoyat ishi qo‘zg‘atilib, hozirda dastlabki tergov harakatlari olib borilmoqda.
