Parijdagi portlashda 37 kishi jarohatlandi
Shuningdek, to‘rt kishining ahvoli og‘ir, vayronalar ostida yana ikki kishi qolgani aytilmoqda.
Parij markazidagi portlash oqibatida kamida 37 kishi jabrlandi. Yana to‘rt kishining ahvoli og‘ir, deya xabar berdi Euronews.
Agentlik maʼlumotlariga ko‘ra, vayronalar ostida yana ikki kishi qolgan bo‘lishi mumkin.
Hodisa Fransiya poytaxtining beshinchi okrugida, Lyuksemburg bog‘i va Panteon yaqinida joylashgan Parijdagi Amerika akademiyasi binosida bo‘ldi.
Dastlabki taxminga ko‘ra, gaz portlashi sodir bo‘lgan. Natijada shikastlangan binoning old qoplamasi yo‘lga qulab tushgan. Yaqin atrofdagi uylar aholisi evakuatsiya qilindi.
Voqea joyiga ikki yuzdan ortiq o‘t o‘chiruvchilar, qutqaruv xizmatlari, shuningdek, Parij meri Ann Idalgo yetib kelgan.
Prokuratura portlash sabablarining ikki varianti — «xavfsizlik qoidalarini buzish» va «odamlarning beparvoligi»ni tekshirmoqda. Bu haqda Parij prokurori Lor Bekyuo brifingda maʼlum qildi.
