Shvetsiya kompaniyalari O‘zbekistondagi iqtisodiy loyihalarga jalb qilinadi
Stokholmda O‘zbekiston elchixonasi xodimlari Shvetsiya milliy savdo kengashi departamenti rahbari bilan uchrashdi.
O‘zbekiston elchixonasi xodimlari Shvetsiya milliy savdo kengashi departamenti rahbari Maykl Kox bilan uchrashuv o‘tkazdi, deya xabar bermoqda “Dunyo”.
Uchrashuvda ikki tomonlama iqtisodiy hamkorlikni yo‘lga qo‘yish masalalari muhokama qilindi. Shvetsiya tomoni O‘zbekistonda olib borilayotgan keng ko‘lamli islohotlar, iqtisodiy sohadagi o‘zgarishlar bilan tanishtirildi. Mamlakatdagi eksport nazorati tizimi va tashqi bozorlarni diversifikatsiya qilish bo‘yicha ko‘rilayotgan saʼy-harakatlar alohida taʼkidlandi.
Muzokaralar natijasida Shvetsiya milliy savdo kengashi ko‘magida shved kompaniyalari bilan hamkorlikni yo‘lga qo‘yish bo‘yicha uchrashuvlar tashkil etish va ularni O‘zbekistondagi iqtisodiy loyihalarga jalb qilish to‘g‘risida kelishib olindi.
Shvetsiya Milliy savdo kengashi Tashqi ishlar vazirligiga bo‘ysunuvchi davlat agentligi bo‘lib, 1651-yilda tashkil etilgan. Kengash tashqi savdo, ichki bozor va savdo siyosati bilan shug‘ullanadi, Shvetsiya hukumatiga soha bo‘yicha tahlil va tavsiyalar berib boradi.
