Ukraina G'arb tomonidan va'da qilingan og'ir qurollarning faqat yarmini oldi

 

Ukraina G‘arb davlatlari vaʼda qilgan og‘ir qurollarning yarmidan bir oz ko‘prog‘ini oldi va ittifoqchilar kamroq yangi majburiyatlarni o‘z zimmalariga ola boshladilar, deyiladi Kil Jahon iqtisodiyoti instituti hisobotida.

 

Institut maʼlumotlariga ko‘ra, G‘arb davlatlaridan Kiyevga harbiy, gumanitar va iqtisodiy yordam ko‘rsatish bo‘yicha yangi vaʼdalarning so‘nggi cho‘qqisi Rossiya istilosi boshlanganining bir yilligi arafasida kuzatilgan. Keyingi hisobot davrida — 2023-yilning 25-fevralidan 31-maygacha ittifoqchilarning faolligi pasaydi, deydi ekspertlar.

 

Taʼkidlanishicha, bu davrda Ukraina oldidagi barcha ro‘yxatga olingan majburiyatlar miqdori 13 milliard yevroga oshib, jami 165 milliard yevroga yetdi. Mutaxassislarning taʼkidlashicha, ushbu majburiyatlarning aksariyati qurol bilan bog‘liq, chunki Ukraina qarshi hujumga tayyorlanayotgan edi.

 

"Harbiy majburiyatlarga bo‘lgan eʼtiborga qaramay, amaldagi yetkazib berishlar vaʼda qilinganidan ancha past bo‘ldi. Umuman olganda, vaʼda qilingan qurollarning faqat yarmidan sal ko‘pi yetkazildi", — deyiladi hisobotda.

 

Mutaxassislar, shuningdek, vaʼdalar va etkazib berishlar o‘rtasidagi tafovut Ukrainaning AQSH, Germaniya va Buyuk Britaniya kabi eng yirik ittifoqchilari kontekstida ko‘proq sezilishini taʼkidladilar. Shu bilan birga, Sharqiy Yevropa mamlakatlari, jumladan Chexiya, Sloveniya, Polsha va Slovakiya vaʼda qilingan og‘ir qurollarning 80 foizdan ortig‘ini yetkazib bergan.

 

Maʼlumot uchun, G‘arb davlatlari Rossiyaning keng ko‘lamli bosqinining boshlanishidan deyarli bir yil o‘tgach, Ukrainani og‘ir qurollar bilan taʼminlashga qaror qilishgan edi. Kil Jahon Iqtisodiyoti Instituti iyul oyi boshida xabar qilganidek, 471 ta tank Ukrainaga topshirilgan, yana 286 tasi keyinroq topshirilishi rejalashtirilgan.