Toshkent viloyatida ichki ishlar xodimlari rezina tayoqdan foydalanib, fuqaroga jismoniy kuch ishlatdi
Erkak pichoq bilan hech bir sababsiz notanish fuqaroning qorin qismiga pichoq bilan zarba bergan
Ijtimoiy tarmoqlarda “Gʻisht koʻprik bojxona posti oldida fuqaro Ichki ishlar xodimlariga pichoq bilan hujum qildi” mazmunli xabarlar koʻplab muhokamalarga sabab boʻldi. Holat yuzasidan Toshkent viloyati Ichki ishlar bosh boshqarmasi batafsil maʻlumot berdi.
Unga ko`ra, aniqlanishicha, 7-iyul kuni, Toshkent tumani hududi, “Gʻisht koʻprik” bojxona posti oldida, Sirdaryo viloyatida yashovchi 1965-yilda tugʻilgan fuqaro, hech bir sababsiz, yoʻl yoqasidan harakatlanib ketayotgan, oʻziga begona boʻlgan 40 yoshli fuqaroning qorin qismiga, yonida boʻlgan pichoq bilan toʻsatdan zarba berib, tan jarohati yetkazgan.
Natijada voqea sodir boʻlgan hududda xizmat olib borayotgan Toshkent viloyati IIBB PPX xodimlari ushbu shaxsning oldiga borib, undan zudlik bilan harakatlarini toʻxtatishni talab qilganlarida, fuqaro xodimlarga va atrofdagi boshqa fuqarolarga ham qoʻlidagi pichoq bilan tashlanib, tahdid qilgan.
“Xodimlar ushbu shaxsni, atrofdagi boshqa fuqarolarga ham shikast yetkazishini oldini olish maqsadida, xizmatda foydalanish uchun biriktirilgan maxsus rezina tayogʻini ishlatib, jismoniy kuch qoʻllagan holda fuqaroni qoʻlga olishgan va zararsizlantirilgan. Jarohatlangan fuqaro xodimlar tomonidan tezlik bilan shifoxonaga olib borilgan”, — deyiladi Toshkent viloyati IIBB xabarida.
Holat yuzasidan ushlangan shaxsga nisbatan Jinoyat Kodeksining 104-moddasi 2-qismi bilan jinoyat ishi qoʻzgʻatilib, tergov harakatlari olib borilmoqda. Shuningdek, gumonlanuvchi fuqaroning ruhiy holati yuzasidan psixologik ekspertiza tayinlangan.
