O`zbekistonda so`nggi 5 yilda avtomobil ishlab chiqarish 2,3 baravarga ko‘paydi
Mamlakatda yengil avtomobillarni ishlab chiqarish hajmi 2022-yilda 328,1 ming donaga yetdi.
Iqtisodiy tadqiqotlar va islohotlar markazi mutaxassislari O‘zbekistonda avtomobilsozlik sanoatining 2017-2022-yillardagi rivojlanish dinamikasini taqdim etdi.
Qayd etilishicha, 2017-2022-yillarda avtomobil ishlab chiqarish hajmi 2,3 baravarga ko‘paydi. Pandemiya va ishlab chiqarish zanjirlaridagi uzilishlarning salbiy taʼsirlari jahon avtomobil bozorlarida saqlanib qolayotganiga qaramay, 2022-yilda O‘zbekiston avtomobilsozlik sanoatida yengil avtomobillarni ishlab chiqarish hajmi keskin ko‘payib, 328,1 ming donaga yetdi. Shuningdek, 2022-yilda 4094 dona yuk mashinalari va 1357 dona avtobuslar ishlab chiqarildi.
Bugungi kunda avtomobilsozlik sohasida mamlakat YAIMining 2022-yilda 1,1 foiz (2017-yilda - 0,6 foiz) va sanoat mahsulotlarining 4 foiz (2017-yilda - 2,8 foiz) yaratiladi.
Shuningdek, 2017-yilda ushbu tarmoqda o‘rtacha 23,5 mingga yaqin kishi ish bilan band bo‘lgan bo‘lsa, 2022-yilga kelib ushbu ko‘rsatkich 29,2 ming nafarga yetgan yoki 24,3 foizga o‘sgan.
