O‘zbekiston davlat xoreografiya akademiyasi faoliyatida ko`plab qonunbuzilish holatlari aniqlandi
Jumladan, oliygohga o‘qishga qabul qilishda shaffoflik taʼminlanmasligi, oylik maoshlarga asossiz qo`shib yozishlar va boshqa holatlar aniqlangan.
Bosh prokuratura tomonidan O‘zbekiston davlat xoreografiya akademiyasi faoliyati o‘rganilganida, oliygohga o‘qishga qabul qilishda shaffoflik ta’minlanmasdan, korrupsiyaviy omillarga zamin yaratilgani aniqlandi.
Jumladan:
- me’yoriy hujjatlar talablariga zid ravishda o‘qishga qabul boshlangani haqida keng jamoatchilikka bir oy oldin xabar berilmagan;
- 496 nafar abituriyentning ijodiy imtihon natijalari videotasvirga olinmagan;
- 52 nafar abituriyentning amaliy ishlari shifrlanmasdan, maxfiyligi ta’minlanmagan holda qabul komissiyasi tomonidan baholangan.
Bundan tashqari, akademiyada 22 nafar o‘qituvchi-pedagoglarga dars mashg‘ulotlari me’yor talablariga zid ravishda qo‘shib yozilib, 319 mln so‘m, o‘tilmagan dars soatlari uchun 154 mln so‘m to‘lab berilgan.
Shuningdek, hujjatlar soxtalashtirilib, haqiqatda ishlamagan 7 nafar xodimlarga 270 mln so‘m, yuklatilgan vazifalarni bajarmagan 6 nafar xodimlarga 107 mln. so‘m asossiz to‘lanib, byudjet mablag‘lari o‘zlashtirilgan.
Shu bilan birga, moddiy javobgar shaxslar tomonidan 76 mln so‘mlik tovar-moddiy boyliklar kamomadiga yo‘l qo‘yilgan.
Aniqlangan qonunbuzilishi holatlari yuzasidan jinoyat ishi qo‘zg‘atilib, hozirda tergov harakatlari olib borilmoqda.
