Qashqadaryoda 21 yoshli qizni behayo rasmlarini tarqatish bilan qo‘rqitgan "kuyov bola" ayol kishi bo‘lib chiqdi
Holat yuzasidan ayol kishiga nisbatan jinoyat ishi qo‘zg‘atilib, 22 yoshli ayolning sodir etilib, fosh etilmay qolgan boshqa shu turdagi jinoyatlarga aloqadorligi yuzasidan surishtiruv ishlari olib borilmoqda.
IIV Kiberxavfsizlik markazining xabar berishicha, Qashqadaryoda 21 yoshli qizni behayo rasmlarini tarqatish bilan qo‘rqitgan yigit ayol kishi bo‘lib chiqdi.
Maʼlum qilinishicha, Qashqadaryo viloyati, Qarshi tumanida yashovchi 21 yoshli ayol ariza bilan murojaat qilib, Telegramda “Farrux-96” nomli profil egasi, uning turli behayo tasvirlari bo‘lgan videolarini ijtimoiy tarmoqlar orqali tarqatib yuborish bilan qo‘rqitib, tarqatmaslik evaziga pul talab qilayotganligini bildirgan.
Tezkor-qidiruv xizmati Kiberxavfsizlik bo‘linmalari tomonidan o‘tkazilgan tezkor-qidiruv tadbirlari natijasida mazkur jinoyatni Qashqadaryo viloyati, G‘uzor tumanida yashovchi 22 yoshli ayol sodir etgani aniqlangan.
Aniqlanishicha, u Telegramda o‘zini Farrux deb tanishtirib, jabrlanuvchini yaxshi ko‘rib qolgani hamda unga uylanish maqsadi borligini aytib, uning ishonchiga kirish orqali uning turli fotosuratlari va behayo videotasvirlarini qo‘lga kiritib, ijtimoiy tarmoqlarda tarqatib yuborish bilan qo‘rqitgan.
Natijada tarqatmaslik evaziga gumonlanuvchi o‘zining bank kartalariga jami 14 mln 300 ming so‘m pulni o‘tkazib olgan va o‘z ehtiyojlari yo‘lida ishlatib yuborgan.
Hozirda mazkur holat yuzasidan Jinoyat kodeksining 165-moddasi 1-qismi bilan jinoyat ishi qo‘zg‘atilib, 22 yoshli ayolning sodir etilib, fosh etilmay qolgan boshqa shu turdagi jinoyatlarga aloqadorligi yuzasidan tezkor-surishtiruv ishlari olib borilmoqda.
