Toshkent viloyatida 3 kishi kanalizatsiyada zaharlanib vafot etdi
Kanalizatsiya qudug‘iga tushib, tozalash ishlarini olib borayotganda zaharlangan 57 yoshli ishchini qutqarish uchun tushgan 3 kishi ham hushidan ketgan.
Toshkent viloyati Nurafshon shahrida 3 kishi kanalizatsiyada zaharlanib vafot etdi, deya xabar bermoqda Bosh prokuratura matbuot xizmatiga tayanib, “Gazeta.uz”.
Aniqlanishicha, 20 iyul kuni «Toshkent kommunal qurilish servis» MCHJ ishchisi — 57 yoshli Q.A. shaharning “To‘ytepa” MFYsida joylashgan suv oqova tarmog‘i (kanalizatsiya) qudug‘iga tushib, tozalash ishlarini olib borayotgan bo‘lgan. Shu vaqtda quduq ichidan chiqqan zaharli gaz aralashmasidan bo‘g‘ilib, hushidan ketgan.
Natijada o‘sha yerda bo‘lgan S.M. (23 yoshi), E.K. (55 yosh) va F.Sh. (27 yosh) quduq ichiga yordam berish maqsadida tushgan, ammo ular ham hushidan ketgan.
Oqibatda Q.A., S.M. va E.K. voqea joyida vafot etgan. F.Sh. esa hushsiz holatda jonlantirish bo‘limiga yotqizilgan.
Sud-tibbiy ekspertizasining dastlabki maʼlumotiga ko‘ra, fuqarolarning o‘limiga vodorod sulfiddan o‘tkir zaharlanish, o‘tkir nafas, yurak-qon tomir yetishmovchiligi kabilar ko‘rsatilgan.
