Prezident yo‘l infratuzilmasidagi kamchiliklarni tanqid qildi
Bir qator viloyat YHXB boshliqlari lavozimidan ozod qilindi
Shavkat Mirziyoyev ishtirokida bo‘lib o‘tgan IIV kengaytirilgan hayʼat yig‘ilishida prezident yo‘l harakati xavfsizligini taʼminlash borasidagi ishlar ahvolidan xalq mutlaqo noroziligini taʼkidladi.
Qayd etilishicha, 2023-yilning o‘tgan olti oyi davomida 4 mingga yaqin avto-avariyalar sodir etilib, 873 nafar shaxs vafot etgan, 3,5 mingdan ortig‘i jarohat olgan.
“Eʼtibor bering, 48 foiz avariyalarning sababi yo‘l infratuzilmasidagi kamchiliklar hisoblanadi. Vaziyatni yaxshilash bo‘yicha ’O‘zavtoyo‘l‘ va hokimliklarning masʼuliyati umuman sezilmayapti. Ular faqat asfalt yotqizish bilan ovora, harakat xavfsizligi esa eʼtibordan chetda qolib ketgan”, - dedi davlat rahbari.
Shu munosabat bilan Ichki ishlar vazirligi Yo‘l harakati xavfsizligi rahbari O.Saidovga hayfsan berildi. Shuningdek, Jizzax, Surxondaryo va Xorazm viloyatlari YHXB boshliqlari lavozimidan ozod qilindi.
