Rasul Kusherbayev O‘zLiDeP safidan chiqishga qaror qildi
Sobiq deputat o'z ixtiyori bilan ushbu qarorni qabul qilganini ta'kidlagan.
Ekologiya, atrof-muhitni muhofaza qilish va iqlim o‘zgarishi vazirining maslahatchisi bo‘lib ishlayotgan Oliy Majlis Qonunchilik palatasi sobiq deputati Rasul Kusherbayev O‘zLiDeP aʼzolari safidan chiqishga qaror qildi. Bu haqda u ijtimoiy tarmoqdagi sahifasida maʼlum qildi.
Sobiq deputat O‘zLiDeP aʼzolari safidan chiqishni so‘rab O‘zbekiston Liberal-demokratik partiyasi siyosiy kengashi ijroiya qo‘mitasi raisi Aktam Xaitov nomiga yozgan arizasini o‘zining Telegram-kanaliga joylashtirgan.
"Partiyadan chiqishim uning aʼzolari safidagi, ishidagi qadrdon aka-uka, opa-singillarimiz bilan bo‘lgan munosabatlarga taʼsir qilmaydi, deb o‘ylayman. Partiyaning menga bergan imkoniyatlari, o‘rgatganlari uchun bir umr minnatdorman!", — deydi u.
Kusherbayevning qo‘shimcha qilishicha, partiya aʼzoligidan chiqishni ancha vaqtdan beri rejalashtirib yurgan.
