Samarqandda 4 nafar yigit suv omborida choʻkib ketdi
Samarqandda qayiqda suratga tushmoqchi bo‘lgan yigitlar cho‘kib ketdi.
Samarqandda qayiqda suratga tushmoqchi bo‘lgan to‘rt nafar yigit suv omborida cho‘kib ketdi, deya xabar bermoqda Bosh prokuratura matbuot xizmatiga tayanib, “Gazeta.uz”.
Maʼlum bo‘lishicha, 30-iyul kuni Qashqadaryo viloyatining Chiroqchi va Ko‘kdala tumanlarida yashovchi 7 nafar fuqaro Samarqand viloyatiga — Nurobod tumani “Po‘lat” mahallasida yashovchi tanishining tug‘ilgan kunini nishonlash maqsadida borgan. Shu kuni soat taxminan 17:30 atrofida mahalladan o‘tuvchi Kattaqo‘rg‘on suv omboriga cho‘milish maqsadida borib, u yerdagi qayiqda suv ombori qirg‘og‘idan taxminan 40 metr uzoqlikka suzib borishgan.
Shu paytda qayiq ustida fotosuratga tushish maqsadida tartibsiz harakatlar qilishgani sababli muvozanatni yo‘qotib, qayiq ag‘darilib ketgan. Oqibatda ularning 4 nafari — 21, 25, 22 va 21 yoshli yigitlar cho‘kib ketgan, 3 nafari qirg‘oqqa suzib chiqishga muvaffaq bo‘lganyu
Olib borilgan qutqaruv ishlari davomida 1 nafar shaxsning murdasi topilgan, hozirda qolganlarini qidiruv-qutqaruv ishlari olib borilmoqda.
