Buxoroda erkaklarga qasddan OIV yuqtirgan ayol ushlandi
Hozirda holat yuzasidan tergov boshlangan.
Buxoro viloyati Romitan tumanida OIV infeksiyasini birovlarga qasddan yuqtirib yurgan ayol ushlandi. Bu haqda viloyat IIB axborot xizmati xabar berdi.
Romitan tumani Oʻzbekiston mahallasida yashovchi R.N. 2019-yilning 18-noyabr kunidan Buxoro viloyati OITSga qarshi kurashish markazi tomonidan OIV infeksiyasini yuqtirib olgan shaxs sifatida roʻyxatga olinib, Oʻzbekiston Respublikasi Jinoyat kodeksining 113-moddasi bilan jinoiy javobgarlikka tortilishi toʻgʻrisida ogohlantirilgan. Shunga qaramasdan u 2023-yilning may oyida Shofirkon tumani Gʻulomte mahallasida yashovchi S.H., Talisafed mahallasida yashovchi B.O. va I.I.lar bilan Buxoro shahrining turli manzillarida himoya vositasiz jinsiy aloqada boʻlib, oʻzida OIV kasalligi borligini bila turib, jabrlanuvchilarga OIV infeksiyasini yuqtirish xavf ostida qoldirgan.
Mazkur holat yuzasidan Buxoro shahar IIO FMB tomonidan Jinoyat kodeksining 113-moddasi 4-qismi bilan jinoyat ishi qoʻzgʻatilib, hozirgi kunda ushbu ayoldan jabrlanish bilan bogʻliq boshqa holatlarni aniqlashga qaratilgan tezkor surishtiruv hamda tergov harakatlari davom ettirilmoqda.
