Iqlim o‘zgarishi vaboga chalinishni ko‘paytiradi—JSST
Maʼlumotlarga ko‘ra, 2022 yilda 30 ta mamlakatda ushbu kasallik epidemiyasi qayd etilgan.
Ekspetlar kelgusida iqlim o‘zgarishi va global isish tufayli dunyoda baʼzi xavfli epidemiyalar avj olishidan xavotirda. Muammoning dastlabki belgilari allaqachon namoyon bo‘la boshlagan.
Masalan, yog‘ingarchilik va bo‘ronu to‘fonlar masumida vabo kasalligi avj olishi maʼlum. Dekabrdan mart oyigacha bo‘lgan davr yomg‘irli kunlarga boy.
Afrikaning Malavi davlatida xuddi shu oylarda vaboga chalinish holatlari kuzatilayotgandi. Ammo vaqt o‘tishi bilan epidemiologik vaziyat o‘zgarmoqda.
Xususan, BMTning Bolalar jamg‘armasi (YUNISEF) vakili Gerrit Marisning qayd etishicha, o‘tgan yili mart oyiga kelib bu mamlakatda endemik bo‘lgan vabo epidemiyaga aylangan.
Yaʼni qurg‘oqchilik mavsumida vabo tarqalishi kuzatildi. Joriy yilda esa bu holat yana-da kuchaygan. Fevral oyi boshida kunlik kasallanishlar soni 700 taga yetdi. O‘lim darajasi 3,3 foizni tashkil etdi. Bu — odatdagidan uch baravar ko‘p ko‘rsatkich.
Mart oyiga kelib esa vabo 1600 nafardan ortiq odamning hayotiga zomin bo‘ldi.
JSST maʼlumotlariga ko‘ra, 2022 yilda 30 ta mamlakatda ushbu kasallik epidemiyasi qayd etilgan. Bu holat avvalgi yillarga nisbatan ko‘rsatkichlar o‘rtacha 50 foizga oshganini anglatadi.
Shu bois olimlar iqlimning keskin o‘zgarishi vaboga chalinish holatlari ortishiga sabab bo‘ladi, deb xulosa qilishmoqda.
