5 ta "metan zapravka" tomonidan 11 mlrd so‘mlik tabiiy gaz o‘g‘irlangani aniqlandi

 

Energetika vazirligi huzuridagi “O‘zenergoinspeksiya” hamda huquqni muhofaza qilish organlari va “Hududgaztaʼminot” AJ xodimlari bilan hamkorlikda Toshkent viloyati hamda Toshkent shahrida joylashgan avtomobillarga gaz to‘ldirish kompressor shoxobchalarida tezkor tadbir o‘tkazildi. Unda bir qancha qonunbuzarliklar aniqlangan. 

 

Jumladan, Toshkent viloyatining Piskent tumanida joylashgan “K.I.K” korxonasiga qarashli 3 ta shoxobchada o‘rnatilgan gazni hisobga olish uskunalarida nazorat qilinadigan maʼlumotlar isteʼmolchilar aralashuvi bilan qisman yo‘qotilishiga yo‘l qo‘yilgan. Yaʼni gazni hisobga olish uskunasining elektr taʼminoti tizimidan vaqti-vaqti bilan uzib qo‘yish yo‘li bilan isteʼmol qilingan tabiiy gaz hajmining haqiqiy ko‘rsatkichlari yashirilgan. Oqibatda, isteʼmol qilingan tabiiy gaz hajmi hisobini yuritish uchun o‘rnatilgan uskunalarning elektron xotira maʼlumotlari yo‘qotilgan. Hisob-kitoblarga ko‘ra, 3 ta shoxobcha umumiy hisobda 8 milliard so‘mga yaqin tabiiy gazdan noqonuniy foydalanilgan. 

 

Toshkent viloyati, Chinoz tumanida joylashgan “K.P.” korxonasiga qarashli shoxobchada o‘rnatilgan «AvtoPilot PRO» rusumli elektron hisoblagichga o‘rnatilgan bir marotabalik nazorat tamg‘asi qasddan buzilgan va hisoblagichdagi ko‘rsatkichlar tashqi taʼsir yordamida kamaytirib ko‘rsatilgan. Hisob-kitoblarga ko‘ra, 1,9 mlrd so‘mlik tabiiy gazdan noqonuniy foydalanilgan.

 

Toshkent shahri, Sergeli tumanida joylashgan “N.Z.F.B” korxonasiga qarashli shoxobchada gaz hisobdoniga tashqi taʼsir ko‘rsatilgan. Hisob-kitoblarga ko‘ra, 1,3 mlrd so‘mlik tabiiy gazdan noqonuniy foydalanilgan.

 

Aniqlangan holatlar yuzasidan rasmiylashtirilgan hujjatlar belgilangan tartibda huquqni muhofaza etuvchi organlariga taqdim qilingan.