Xalqaro qidiruvga berilgan jinoyatchi Misrdan O'zbekistonga olib kelindi

 

Interpolning Oʻzbekistondagi Milliy markaziy byurosi xodimlari tomonidan ilk bor Misrdan diniy ekstremistik tashkilotlarda ishtirok etgani uchun xalqaro qidiruvda boʻlgan jinoyatchi ekstraditsiya qilindi, deya xabar bermoqda IIV.

 

Ma'lum qilinishicha, Interpolning Toshkent va Qohiradagi Milliy markaziy byurolarining muvofiqlashtiruvchi chorasi natijasida, Interpol Bosh kotibiyati tomonidan oʻtkazilayotgan xalqaro uchrashuvlar doirasida byurolar rahbarlari oʻrtasida ikki tomonlama aloqalar hamda Interpolning bevosita yordami tufayli Misr politsiyasi, jinoyatchining Misrdan Oʻzbekistonga ekstraditsiya qilinishi birinchi marta amalga oshirildi.

 

Mazkur shaxs islom universitetida tahsil olish maqsadida Misrga borgan va yashirin yigʻilishlarda qatnasha boshlagan, keyinchalik esa diniy ekstremistik oqimga aʼzo boʻlgan. U yerda esa oʻz tarafdorlarini koʻpaytirish maqsadida fundamentalizm gʻoyalarini targʻib etib, islom diniga qiziquvchi va Qohiraga oʻqish uchun kelganlar orasida targʻibot ishlarini olib borgan. Natijada unga nisbatan ayb eʼlon qilinib, u xalqaro qidiruvga berilgan

 

Kelib tushgan maʼlumotlarga koʻra, jinoyatchi Misrda yashiringan va tezkor-qidiruv tadbirlari davomida qoʻlga olingan. Interpolning Toshkent va Qohiradagi Milliy markaziy byurolarining hamkorlikdagi harakatlari bilan jinoyatchi Misrdan Oʻzbekistonga ekstraditsiya qilindi va endilikda u sodir etgan jinoyati uchun javob berishiga toʻgʻri keladi, deyiladi IIV xabarida.