Italiya koronavirus bilan bog‘liq so‘nggi cheklovni bekor qildi

 

Italiya vazirlar kengashi Omnibus deb nom berilgan hukumat dekretini maʼqulladi. Mazkur hujjat o‘zida keyinga qoldirib bo‘lmaydigan choralar paketini jamlagan. Unga ko‘ra, koronavirus bilan xastalanganlarni majburiy yakkalash bekor qilinadi.

 

Xabarda bu COVID-19 pandemiyasi tufayli joriy qilingan cheklovlarning eng so‘ngisi ekani aytilmoqda. “Epidemiologiya vaziyati, vaksinalar va dori-darmonlar ushbu cheklovga zarurat qoldirmaydi. Sog‘liqni saqlash vazirligi nazoratni davom ettiradi va zarurat tug‘ilganda barcha choralarni ko‘radi”, – deydi Italiya sog‘liqni saqlash vaziri Oratsio Skillachi.

 

JSSTning so‘nggi haftalik epidemiologiya maʼlumotlarida keltirilishicha, dunyoning faqat 46 foiz mamlakatlari va hududlarida iyul oyida COVID-19 bilan bog‘liq holatlar aniqlangan. Tashkilot maʼlumotlariga ko‘ra, iyul oyida milliondan ziyod odam koronavirus yuqtirgan va 3,1 ming kishi vafot etgan.

 

Ko‘rinib turibdiki, koronavirus hali ham dunyo kezib, o‘z qurbonlarini qidirmoqda. Qolaversa, virusning yangi-yangi shtammlari paydo bo‘layotgani ham odamlarni ushbu kasallikka befarq bo‘lmaslikka undaydi. Masalan, The Economic Times gazetasining so‘nggi sonida kuni kecha  Hindistonda COVID-19 xastaligining Eris deb nom berilgan yangi varianti aniqlangani haqida xabar tarqatildi. Xabarda Hindiston kasalliklar genomikasi bo‘yicha konsorsiumi aʼzosi Eris bilan bog‘liq holat qayd etilgani haqida maʼlum qilgani aytiladi. Mutaxassisning taʼkidlashicha, hozircha xavotirga o‘rin yo‘q.

 

Aniqlik kiritilishicha, ushbu EG.5.1 shtammi “omikron”dan paydo bo‘lgan. Variant ilk bor joriy yilning mart oyida aniqlangan edi. O‘tgan oylarda u Buyuk Britaniyada ham paydo bo‘ldi. Shu vaqtgacha shtamm shifokorlar xavotiriga sabab bo‘lmagan edi, biroq olimlarni uning tarqalish surʼati yuqoriligi va virus yuqtirganlar sonining o‘sishi xavotirga solmoqda.

 

Hindiston sog‘liqni saqlash vazirligi tarqatgan maʼlumotda aytilishicha, so‘nggi bir kunda mamlakatda 54 ta yangi koronavirus tashuvchisi aniqlangan. Mamlakat bo‘yicha jami kasallanganlar soni 1 ming 574 kishiga yetgan. Konsorsium rahbari va JSSTning viruslar evolyutsiyasi bo‘yicha maslahatchilar guruhi raisi Anurag Agravalning taʼkidlashicha, insonlarda immunitet pasaygan sari virus yuqtirish va yangi mutatsiyalar rivojlanish holatlarining vaqti-vaqti bilan ko‘payishi kuzatiladi.