Rossiyada O'zbekistondagi banklardan birining sobiq rahbari ushlandi
Ayblanuvchi huquq-tartibot organlari tomonidan O'zbekistonda qidiruvga berilgan.
Rossiyada O'zbekistonda pul mablag‘larini o‘zlashtirishda ayblanayotgan Qarshi shahridagi bank filialining sobiq rahbari qo‘lga olindi. Bu haqda Rossiyaning Saratov viloyati prokuraturasi xabar berdi.
Tergov xulosasiga ko'ra, ayblanuvchi 2019-2020-yillarda Qarshi shahridagi bank filiali boshlig‘i lavozimida ishlab, boshqa shaxslar nomiga kredit berish to‘g‘risida qalbaki hujjatlarni rasmiylashtirib, pul mablag'larini o‘zlashtirib yuborgan.
Natijada davlat manfaatlariga 53 million so‘mdan ortiq zarar yetkazilgan. Bundan tashqari, u fuqarolarning jami 33 million so‘mlik pul mablag‘larini va O‘zbekiston fuqarosining pasportini ham o‘zlashtirib olgan. Gumonlanuvchi joriy yilning may oyida Saratov viloyatining Ozinskiy tumanida chegara nazoratidan o‘tayotganda qo‘lga olingan.
Qayd etilishicha, prokuratura O‘zbekistonda qidiruvda bo‘lgan 47 yoshli shaxsga nisbatan ekstraditsiya tekshiruvini yakunlagan. Ayblanuvchini O‘zbekiston huquq-tartibot organlariga ekstraditsiya qilish to‘g‘risida qaror qabul qilingan.
