Terrorchilik tashkilotini moliyalashtirgan farg‘onalik erkak ushlandi
Hozirda unga nisbatan jinoyat ishi qo‘zg‘atilgan.
Janubiy Koreyadan turib Suriyadagi terrorchilik tashkilotini moliyalashtirgan 29 yoshli farg‘onalik erkak aniqlandi. Bu haqda IIV TQD Terrorizmga qarshi kurashish xizmati xabar bermoqda.
Maʼlum bo‘lishicha, 1994 yilda Farg‘ona viloyatida tug‘ilgan G‘.O. ismli shaxs Janubiy Koreya davlatiga borib, u yerda “Imom al-Buxoriy katibasi” terrorchilik tashkiloti yetakchilari bilan aloqa o‘rnatib, ularning noqonuniy faoliyatini moliyalashtirib kelgan.
Holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, dastlabki tergov harakatlari olib borilmoqda.
