Endi IIV Akademiyasida xorijiy kadrlar tayyorlanadi
Bu bo‘yicha Prezidentning tegishli qarori qabul qilindi.
Ichki ishlar vazirligi Akademiyasida xorijiy davlatlar ichki ishlar organlari kadrlarini tayyorlash yo‘lga qo‘yiladi.
Hujjatga ko‘ra, 2024/2025 o‘quv yilidan Ichki ishlar vazirligi Akademiyasida xorijiy davlatlar ichki ishlar organlari (politsiya) kadrlarini tayyorlash, qayta tayyorlash va malakasini oshirish tizimi yo‘lga qo‘yiladi.
Akademiyada Xorijiy kadrlar bilan ishlash fakulteti tashkil etiladi.
Qaror bilan bu bo‘yicha nizom tasdiqlandi. Nizomga muvofiq, Akademiyada xorijiy kadrlarga taʼlim berish ikki va ko‘p tomonlama xalqaro shartnomalarga muvofiq amalga oshiriladi.
“Akademiyada xorijiy kadrlar uchun yillik qabul kvotalari prezident tomonidan belgilanadi”, deyiladi hujjatda.
Xorijiy davlatlar kesimidagi har yilgi kvota, mutaxassislik va o‘qitish turi bo‘yicha taqsimot Ichki ishlar vazirligi tomonidan Prezident huzuridagi Xavfsizlik kengashi apparati bilan kelishgan holda amalga oshiriladi.
"Akademiyaga xorijiy kadrlar kirish imtihonlarisiz o‘qishga qabul qilinadi", deb belgilangan hujjatda.
Xorijiy kadrlarga o‘zbek, rus va ingliz tillarida taʼlim beriladi.
Xorijiy kadrlarni tayyorlash bakalavriat, magistratura va oliy taʼlimdan keyingi taʼlim dasturlari bo‘yicha kunduzgi taʼlim shaklida, qayta tayyorlash va malaka oshirish dasturlari bo‘yicha kunduzgi va masofaviy shakllarda amalga oshiriladi.
Bakalavriat taʼlim dasturlarini o‘zlashtirgan xorijiy kadrlarga mutaxassisligi bo‘yicha malaka, belgilangan davlat namunasidagi diplom va ko‘krak nishoni beriladi.
Magistratura taʼlim dasturlarini o‘zlashtirgan xorijiy kadrlarga tegishli magistr darajasi hamda belgilangan davlat namunasidagi diplom va ko‘krak nishonlari beriladi.
Tayanch doktorantura dasturini o‘zlashtirgan va belgilangan tartibda dissertatsiya himoya qilgan xorijiy kadrlarga tegishli fanlar bo‘yicha falsafa doktori (PhD) ilmiy darajasi beriladi.
Qisqa muddatli kurslarni tamomlagan xorijiy kadrlarga belgilangan namunadagi guvohnomalar (sertifikatlar) beriladi.
Shuningdek, o‘qishga qabul qilingan vaqtda ofitserlik unvoniga ega bo‘lmagan, bepul asosda taʼlim oluvchi xorijiy kadrlarga “Akademiya kursanti” lavozimi bo‘yicha pul taʼminoti beriladi.
