Dog‘istondagi portlashda 4 nafar O'zbekiston fuqarosi halok bo'ldi
Portlash oqibatida halok bo‘lgan va jarohatlanganlarning oilalariga 1 mln rubl miqdorida yordam ko'rsatiladi.
Maxachqal’ada ro‘y bergan portlashda to‘rt nafar O‘zbekiston fuqarosi halok bo‘ldi. Bu haqda Dog‘iston rahbari matbuot xizmatiga tayanib "TASS" xabar bermoqda. Dog‘iston rahbari Sergey Melikovning aytishicha, Maxachqal’a chekkasidagi yoqilg‘i quyish shoxobchasi oldida sodir bo‘lgan portlash natijasida xorijiy davlatlar fuqarolari halok bo‘lgan.
"Dastlabki ma'lumotlarga ko'ra, Maxachqal'a chekkasida sodir bo'lgan portlash oqibatida to'rt nafar O'zbekiston fuqarosi halok bo'lgan. Qurbonlarning oilalariga 1 million rubl miqdorida yordam ko'rsatiladi", - deyiladi xabarda.
"TASS"ning yozishicha, fojiadan bir necha kun o‘tib Dog‘iston jamg‘armalari tomonidan halok bo‘lganlar va jarohatlanganlarning oilalariga yordam berish uchun 100 million rubldan ortiq mablag‘ yig‘ilgan.
Ma'lumot uchun, 14-avgust kuni kechqurun Maxachqalʼada avtomobillarga texnik xizmat ko‘rsatish stansiyasida portlash ro‘y bergandi. Natijada portlashdan keyin chiqqan yong‘in uning yonidagi avtomobillarga yonilg‘i quyish shoxobchasi bo‘ylab tarqalgan. Yong‘in oqibatida 35 kishi halok bo‘lib, yana 75 kishi jarohat olgan. Respublikada motam eʼlon qilingan.
