O‘zbekiston bo‘ylab sifatsiz benzin sotilayotgani aniqlandi
Bu ishga beeʼtibor bo‘lgan 8 nafar shaxsga huquqiy baho beriladi.
"O‘zbekneftgaz" maʼlumotiga ko‘ra, respublika bo‘ylab katta miqdorda talabga javob bermaydigan benzin mahsulotlari aniqlandi.
Respublika bo‘yicha isteʼmolchilarga berilayotgan avtobenzin sifati bo‘yicha eʼtirozlar ko‘payganligi sababli, neft bazalar va AYOQSHlar orqali sotilayotgan benzinning sifati bo‘yicha o‘rganishlar va tahlillar olib borilgan.
Joriy yilning o‘tgan davri mobaynida kelib tushgan murojaatlar asosida “O‘zenergoinspeksiya” xodimlari tomonidan o‘tkazilgan o‘rganishlarga asosan Kuchlik neft bazasi (73,2 tonna), Navoiy neft bazasi ( 38,7 tonna), Urganch neft bazasi (2,072 ming tonna) va Buxoro neft bazalari (1,86 ming tonna) MCHJlarda saqlanayotgan avtobenzin sifati O‘z Dst 3031:2015 davlat standarti talablariga javob bermasligi, yaʼni avtobenzin tarkibidagi qatron (smola) va oltingugurt (sera) miqdori belgilangan meʼyordan yuqori hamda bir holatda (“Navoiy neft bazasi” MCHJ) oktan soni meʼyordan pastligi aniqlangan. Jami aniqlangan sifatsiz mahsulotlar miqdori 4,044 ming tonnani tashkil etgan.
Kuchlik (73,2 tonna) va Navoiy (38,7 tonna) neft bazalarida aniqlangan sifatsiz neft mahsulotlarining sifatlari “O‘zenergoinspeksiya”ning majburiy ko‘rsatmasiga asosan, O‘zbekiston neft va gaz ilmiy tadqiqot va loyihalash instituti, “O‘zneftmahsulot" va “O‘zdavneftgazinspeksiya” tomonidan ishlab chiqilib 2012 yilning 1 oktyabr kunidan kuchga kirgan “Neft, gaz kondensati va neft mahsulotlarini qabul qilish, saqlash, tashish, berish va hisobga olish bo‘yicha yo‘riqnoma” 30-sonli ilovasining 4-bandi “Nokonditsion mahsulotlarni aniqlash bilan bog‘liq asosiy chora-tadbirlar, mahsulotlar sifatini tiklash” asosida o‘rnatilgan tartibda tiklanib, kamchilik bartaraf etilib, isteʼmolchilarga sifatli tarzda yetkazib berilgan. Neft mahsulotlarining sifati bo‘yicha isteʼmolchilardan eʼtirozlar bo‘lmagan.
“Urganch neft bazasi” MCHJ va uning Shovot hamda Xonqa filiallarida (2,072 ming tonna) aniqlangan sifatsiz avtobenzinning 587,0 tonnasini “O‘zenergoinspeksiya”ning majburiy ko‘rsatmasiga asosan, yuqorida keltirilgan yo‘riqnoma talablari asosida o‘rnatilgan tartibda sifati tiklanib, isteʼmolchilarga yetkazib berilgan. Ushbu mahsulot bo‘yicha ham isteʼmolchilardan eʼtirozlar kelib tushmagan. Hozirgi kunda 1,485 ming tonna avtobenzinining sifatini tiklash ishlari davom ettirilmoqda.
“Buxoro neft bazasi” MCHJ va uning Qorako‘l filialida (1,86 ming tonna) aniqlangan sifatsiz neft mahsulotlarining 323,0 tonnasini “O‘zenergoinspeksiya”ning majburiy ko‘rsatmasiga binoan, yuqorida keltirilgan yo‘riqnoma talablari asosida o‘rnatilgan tartibda sifati tiklanib, isteʼmolchilarga yetkazib berilgan. Hozirgi kunda 1,537 ming tonna avtobenzinning sifatini tiklash ishlari davom ettirilmoqda.
Neft mahsulotlari sifatining buzilishiga yo‘l qo‘ygan 4 nafar rahbar xodim va 4 nafar moddiy javobgar shaxslar faoliyatiga nisbatan huquqiy baho beriladi.
Neft mahsulotlarini sifat va miqdor jihatidan bus-butun saqlanishini taʼminlash yuzasidan barcha neft baza rahbarlari ogohlantirilgan va kelgusida neft mahsulotlarini sifat jihatidan to‘liq saqlash hamda isteʼmolchilarga sifatli tarzda yetkazib berilishini taʼminlash bo‘yicha neft bazalar tomonidan tegishli chora-tadbirlar ishlab chiqilmoqda, deyiladi xabarda.
