3,2 milliard so‘mlik sifatsiz dorilar isteʼmoliga chek qo‘yildi
Bu haqda Bosh prokuratura huzuridagi Iqtisodiy jinoyatlarga qarshi kurashish departamenti boshlig‘i maʼlum qildi.
Tadbirkorlik subyektlarining himoyasi, biznesni rivojlantirishga to‘siq bo‘layotgan omillarni bartaraf etish borasida ular faoliyatiga noqonuniy aralashish, huquq va manfaatlarini qo‘pol ravishda buzish bilan bog‘liq 181 ta jinoyatga chek qo‘yildi.
Sifatsiz yoki qalbaki dori vositalarining noqonuniy aylanmasiga chek qo‘yish borasida olib borilgan tezkor-qidiruv tadbirlarida 56 ta holatda 3,2 mlrd so‘mdan ortiq sifatsiz dorilarning aholiga sotilishining oldi olindi.
Kuchli taʼsir qiluvchi, narkotik hamda psixotrop moddalarni saqlash va o‘tkazish bilan bog‘liq fosh etilgan 90 ta jinoyat ishi doirasida 423 mln so‘mlik dorilar noqonuniy muomaladan olib qo‘yildi.
Inson hayotiga hamda sog‘lig‘iga xavf soluvchi kontrafakt va sifatsiz mahsulotlarni ishlab chiqarish hamda o‘tkazish bilan bog‘liq 434 ta huquqbuzarlik aniqlanib, 23,4 mlrd so‘mdan ziyod bo‘lgan yaroqsiz mahsulot muomaladan chetlatildi.
Bundan tashqari, 1 515 ta tadbirkorlik subyektiga huquqiy va amaliy yordam ko‘rsatilib, natijada 3 157 ta yangi ish o‘rinlari yaratildi.
