Prezident maslahatchisi uyma-uy yurib aholi muammolarini o‘rganmoqda
G‘ofurjon Mirzayev Andijondagi taʼlim, suv, mehnat muhojirlari bilan bog‘liq muammolarga eʼtibor qaratdi.
Davlatimiz rahbari topshirig‘iga asosan olib borilayotgan “Obod ko‘cha”, “Obod mahalla”, “Obod xonadon” mezonlarini joriy qilish, hududlar infratuzilmasini yaxshilash bo‘yicha keng ko‘lamdagi amaliy ishlar Andijon viloyati Jalaquduq tumani “Qutluq” MFYda ham jadal suratlarda boshlab yuborildi.
Aholini o‘ylantirib kelayotgan muammolarga o‘z vaqtida va sifatli yechim topish maqsadida Prezident maslahatchisi G‘ofurjon Mirzayev boshchiligidagi Respublika ishchi guruhi vakillari ham bevosita joylarga chiqqan holda uyma-uy yurib o‘rganishlar olib bormoqda.
Xususan, mahalladagi 43-sonli umumtaʼlim maktabi holati ko‘zdan kechirildi. Qayta taʼmirdan so‘ng foydalanishga topishirilishi rejalashtirilgan mazkur o‘quv dargohida boshlangan ish jarayoni, kelgusida amalga oshiriladigan qurilish ishlari bilan yaqindan tanishildi.
Shuningdek, mahalla yig‘ini infratuzilmasi, aholining toifalari bo‘yicha maishiy-ijtimoiy shart-sharoitlari atroflicha o‘rganildi. Mutasaddilarning axborotlari tinglandi.
Prezident maslahatchisi maktab faoliyati, o‘qituvchilarning saviyasi, ularning malakasini oshirish bilan bog‘liq muammolarga to‘xtaldi. Chunki ushbu o‘quv dargohidan oliy taʼlimga o‘qishga kirgan o‘quvchilarning soni oz ekanini bevosita muallimlar bilimiga, tajribasiga bog‘liq bo‘lishiga eʼtibor qaratdi.
U aholining toza ichimlik suviga bo‘lgan talabini qondirish, ayniqsa, obodonchilik ishlariga alohida yondashuv kerakligini taʼkidladi. Davlat xalq manfaati uchun amaliy ishlarni qiladi, ammo ayrim mahallalarda baʼzi bir fuqarolarning “davlat, hokimiyat qilib beradi” degan boqimanda kayfiyati hamon borligi, mana shu odat tusiga kirib qolgan illatga o‘rganib qolish holatlari hamon yashovchanligini aytib o‘tdi.
Obodlikka har bir xonadon egasi o‘zi, ota-onalar, xonadon kattalari, avvalo, farzandlarini o‘rgatishi kerak, ko‘nikma hosil qilsin. Birga yashayotgan oila, xonadan aʼzolari yashash joylarini, birinchi navbatda, maishiy nuqtalarni ozoda va pokiza saqlashga, mavjud tomorqalardan unumli foydalanishga odatlanishi, erishishi shart.
"Sizlarning yerlaringiz tilloga teng. Sirdaryoning yerlariga o‘xshagan sho‘rmas", — dedi G‘ofurjon Mirzayev.
Ayniqsa, tomorqa xo‘jaliklari oilaga qo‘r, qo‘shimcha daromad keltiradigan manbasi, ulardan samarali foydalanishni qatʼiy yo‘lga qo‘yish kerak bo‘ladi.
Mahalla hududidagi 195 nafar mehnat migrantlarini qaytarish choralarini tezlashtirish kerak, hududdagi tikuvchilik bilan shug‘ullanadigan tadbirkorlar ishini takomillashtirish, aholi maʼlumotlarini raqamlashtirish va maʼlumotlar bazasini yaratish borasidagi ishlar, mahalla “beshligi”ni kuchaytirish maqsadga muvofiqdir.
Qabristonlarni obod saqlash, kuz va qishki ariq tozalash ishlarini boshlash zarurligini taʼkidladi, mahalla ko‘chalari va suv yo‘llari ahvoli bilan qiziqdi.
“Qutlug‘” mahalla fuqarolar yig‘ini Navo ko‘chasidagi maktab hovlisida bo‘lib o‘tgan uchrashuv va suhbatda Prezident maslahatchisi viloyat va tuman hokimligi, viloyat va tuman prokuratura, ichki ishlar, taʼlim tizimi mutasaddi rahbarlari, Respublika ishchi guruhi aʼzolari bilan yuqoridagi kabi o‘nlab dolzarb mavzularda so‘z yuritdi. Mahalla oqsoqollari va aholi vakillari bilan suhbat o‘tkazdi.
"Ushbu dastur ijrosi bilan katta amaliy ishlar qilinadi. Respublika ishchi guruhi shug‘ullanmoqda. Biz viloyat bo‘yicha ushbu dasturga tushgan hududlarda tashkil etilayotgan amaliy ishlarni o‘rganib borish bilan birga yordam ham beramiz", — deydi ishchi guruh aʼzosi Yangiboy Mahammadiyev.
Tuman hokimi Hikmatillo Latipov ham dasturga tushgan hudud aholi vakillari bilan shu joyda uchrashdi.
"Suv muammosi bor edi. Kelgusida suv sig‘imi katta bo‘lgan yangi suvxona qo‘yiladi. Shu hudud sektor rahbari, viloyat prokurori ham kelib, “nima qilsak suv yaxshi bo‘ladi” deb savol berdi. Nasos yangilanadi. Tumanga olinadigan 17 ta suv nasosning bittasi shu yerga qo‘yiladi. Bu yerdagi kichik transformator 100 likka almashtiriladi. Endi masalaning ikkinchi tomoni ham bor. Qars ikki qo‘ldan chiqadi. Sizlar yashayotgan ko‘chalarda shuncha amaliy ishlar bo‘lyapti, lekin aholining bunga javobi qanday? Ular o‘zlari yashab turgan hovli joylarga, obodonchilik ishlariga, yaxshi, ozoda turmush madaniyatiga erishish borasidagi ishlarga qanday hissa qo‘shyapti, bunga munosabati va ishtiroki qanday bo‘lyapti?", — degan savollarni ko‘ndalang qo‘ydi tuman rahbari.
