"Otning o'limi — itning bayrami"
Sergelidagi favqulodda hodisadan foydalanib, aholidan pul undirmoqchi bo‘lganlar aniqlandi.
Avvalroq Toshkent shahar Sergeli tumani “Quruvchilar” dahasida joylashgan omborxonalarning birida kuchli chaqnash oqibatida yong‘in sodir bo‘lgani haqida xabar qilingandi. Poytaxt hokimligining ma’lum qilishicha, tumanda sodir bo‘lgan favqulodda hodisa natijasida aholining zarar ko‘rgan uy-joylarini tiklash ishlari jadal davom etmoqda.
Qayd etilishicha, bu ishlarning barchasi aholi uchun bepul amalga oshirilmoqda.
“Afsuski, murakkab vaziyatdan foydalanib, aholidan pul undirish niyatida bo‘lgan shaxslar mavjudligi aniqlandi. Ular hukumat tomonidan bepul amalga oshirilayotgan ishlar uchun yurtdoshlarimizdan pul so‘rab, ularning soddaligidan foydalanmoqda.
Hurmatli jabr ko‘rgan yurtdoshlar! Barcha ishlar siz uchun bepul ravishda bajarilmoqda, noinsof shaxslarning gaplariga ishonib, aldanib qolmang”, — deya ogohlantiradi Toshkent shahar hokimligi matbuot xizmati.
