Pokistonda minglab odamlar iflos havodan kasallandi
Hozirda maktablar va bozorlar yopilgan.
Pokiston sharqida joylashgan Lahor shahri qalin va kuchli tutun bilan qoplangan. Minglab odamlarning zaharli havo tufayli salomatligi yomonlashdi.
Zaharli havo tufayli rasmiylar maktablar, bozorlar va bog‘larni to‘rt kunga yopdi.
Shifokorlar mahalliy aholiga himoya niqobisiz tashqariga chiqmaslikni, iloji bo‘lsa uylarini tark etmaslikni maslahat berishmoqda.
Ifloslanishning asosiy sababi kuzgi bug‘doy ekish mavsumi boshida dalalarni yoqishdir.
Shu bilan birga, mutaxassislar bir vaqtlar yam-yashilligi tufayli bog‘-shahar nomi bilan mashhur bo‘lgan Lahor aholisining tez o‘sishi tufayli havo sifati yomonlashganini taʼkidlamoqda.
Hozirda shaharda 11 milliondan ortiq kishi istiqomat qiladi.
