YI 2027-yil oxirigacha Rossiya gazidan to‘liq voz kechadi — Fon der Lyayen
Rossiya gazining YI importidagi ulushi allaqachon 45 foizdan 12 foizgacha qisqargan.
Yevropa Ittifoqi 2027-yil oxirigacha Rossiya gazining importini to‘liq to‘xtatishni rejalashtirmoqda. Bu haqda Yevrokomissiya raisi Ursula fon der Lyayen 6-oktyabr kuni Yevroparlamentdagi nutqida ma’lum qildi.
Uning so‘zlariga ko‘ra, Rossiya gazining YI importidagi ulushi so‘nggi to‘rt yil ichida 45 foizdan 12 foizgacha kamaygan. Fon der Lyayen kelgusi yil oxirigacha bu ko‘rsatkich nolga tushirilishini ta’kidladi.
Yevrokomissiya rahbari Rossiya gazidan voz kechish Yevropadagi energetik inqiroz va energiya narxlarining yuqoriligiga qaramay amalga oshirilishini bildirdi. Uning qayd etishicha, fevral oxiridan buyon gaz narxlari 140 foizga, dizel yoqilg‘isi narxi esa ikki baravarga oshgan.
Fon der Lyayenning ta’kidlashicha, Yevropa Ittifoqi gaz ta’minoti manbalarini diversifikatsiya qilgan va toza energetikaga investitsiyalarni tezlashtirgan.
Avvalroq “Yevropeyskaya pravda” Yevropa 2026-yilning dastlabki sakkiz oyida Rossiyaning Arktikadagi gaziga 7,3 milliard yevro sarflagani haqida xabar bergan edi. Bu 2025-yil davomida sarflangan mablag‘dan ko‘proq.
2027-yil 1-yanvardan Yevropa Ittifoqiga Rossiya suyultirilgan tabiiy gazini (STG) import qilishga to‘liq taqiq kuchga kirishi kutilmoqda. Shu bilan birga, eski shartnomalar asosida gazni uchinchi mamlakatlarga yetkazib berish bo‘yicha ayrim vaqtinchalik istisnolar saqlab qolingan.
