Pokiston Eron hujumida ikki bola halok bo‘lganini maʼlum qildi

 

Pokiston hukumati Eronni “Jaysh al-Adl” qurolli guruhiga qilingan hujum natijasida havo hududini buzganlikda aybladi va Eronning Islomoboddagi elchisini chaqirtirdi.

 

Pokiston chorshanba kuni Eron o‘z hududiga havo hujumi uyushtirganini va umumiy chegara yaqinidagi hududga zarba berganini aytdi.

 

Eron OAVlari raketalar va uchuvchisiz uchish apparatlari Pokistondagi "Jaysh al-Adl" shtab-kvartirasiga zarba bergani va Tehronning harakatini “Eronning mamlakat xavfsizligiga qarshi tajovuzga javoban yana bir hal qiluvchi qadami” deb ataganini xabar qildi.

 

Islomobodning bildirishicha, Eron havo hujumlarida ikki bola halok bo‘lgan va uch nafari jarohatlangan, Islomobod buni havo hududining buzilishi deb atagan. Portlashlar ikki davlat 1000 km.ga yaqin aholi siyrak chegarasida joylashgan tog‘li Belujiston viloyatida sodir bo‘lgan.

 

"Pokiston suverenitetini buzishni mutlaqo qabul qilib bo‘lmaydi va bu jiddiy oqibatlarga olib kelishi mumkin", — deyiladi Pokiston Tashqi ishlar vazirligi bayonotida.

 

Departament bayonotida aytilishicha, Pokiston "bu noqonuniy harakatga javob berish" huquqini o‘zida saqlab qoladi, oqibatlari uchun javobgarlik faqat Eron zimmasiga tushadi.

 

Pokiston tashqi ishlar vazirligi o‘z elchisini Tehrondan chaqirib oldi va ayni damda Eronda bo‘lib turgan Eronning Pokistondagi elchisi ham hozircha qaytmasligi mumkinligi xabar qilingan.

 

Islomobod, shuningdek, yaqin kunlarda Pokiston va Eron o‘rtasida davom etayotgan yoki rejalashtirilayotgan barcha oliy darajadagi tashriflarni to‘xtatishga qaror qildi.

 

“Kecha Eron tomonidan Pokiston suverenitetining asossiz va qo‘pol ravishda buzilishi xalqaro huquq va BMT Nizomining maqsad va tamoyillarini buzilishidir”, — dedi vazirlik vakili Mumtoz Zahra Baloch.

 

Jaysh al-Adl yoki Adolat armiyasi kamida 2013 yildan beri Eron chegarachilariga qarshi halokatli hujumlar uyushtirgan va avvalroq portlashlar sodir etilgani va chegarachilarni o‘g‘irlaganini daʼvo qilgan. Eronning Nournews agentligiga ko‘ra, guruh bazalari Belujiston viloyatida joylashgan.

 

“Pokiston har doim terrorizm mintaqadagi barcha davlatlar uchun umumiy tahdid ekani va bu muvofiqlashtirilgan harakatlarni talab qilishini taʼkidlab keladi. Bunday bir tomonlama harakatlar yaxshi qo‘shnichilik munosabatlariga to‘g‘ri kelmaydi va ikki tomonlama ishonchga jiddiy putur yetkazishi mumkin”, — deyiladi mamlakat TIV bayonotida.

 

Dushanba kuni Eron Suriya shimoliga, shuningdek, Iroq shimolidagi Iroq Kurdistonidagi Erbil shahrini nishonga olgan holda “Islomiy davlat” guruhini nishonga olgan raketalarni uchirdi. Seshanba kuni Bag‘dod bir necha tinch aholining hayotiga zomin bo‘lgan hujumlarni Iroq suverenitetini “qo‘pol ravishda buzish” deb atadi va o‘z elchisini Tehrondan chaqirib oldi.