Rossiyada 6000 kishi mushukning qaytarilishini talab qildi
Do‘kondan chiqarib yuborilgan jonivorning ijtimoiy tarmoqlarda mashhur ekani aytilmoqda.
Rossiyaning Kaliningrad viloyatidagi 6 mingdan ortiq odam do‘kondan chiqarib yuborilgan mushukning qaytarilishini talab qilib, onlayn arizaga imzo chekdi.
Maʼlum bo‘lishicha, Zelenogradsk shahridagi do‘konda yashovchi Sergey laqabli mushuk Ikki yildan beri ijtimoiy tarmoqlardagi turli videolari orqali mashhurlikka erishib kelmoqda. Jumladan, u hozirgacha bir nechta reklama roliklarida suratga tushib ulgurgan. Ammo uning ustidan isteʼmolchilar xavfsizligini nazorat qiluvchi mahalliy bo‘limga shikoyat kelib tushgach, rasmiylar mushukni do‘konda bo‘lishini taqiqladi.
Shundan so‘ng, Sergeyning yo‘qligini payqagan mahalliy aholi va sayyohlar uning qaytarilishini talab qilib, onlayn ariza bera boshlashgan va buni uddalashgan.
“Uning qaytishiga yordam bergan g‘amxo‘r odamlardan juda minnatdormiz”, — deydi do‘kon egalari.
