AQShning eng boy universiteti qaysi?
Mamlakatning 688 ta kollej va universitetlari o'rtasidagi reyting natijalari ochiqlandi.
Garvard universiteti National Association of College and University Business Officers hamda Commonfund Institute tomonidan tuzilgan AQSHning eng boy universitetlari reytingida birinchi o‘rinni egalladi.
Forbes jurnali ma’lumotlariga ko‘ra, Garvardning jamg‘arma fondi deyarli 49,5 milliard dollarni tashkil qilgan.
Ikkinchi o‘rinda, bir oz ortda qolish bilan, qariyb 45 milliard dollar jamg‘armasi bilan Texas universiteti turibdi. Ta’kidlanishicha, Garvardda Texas universitetidan taxminan 10 barobar kam talabalar bor.
Eng boy ta’lim muassasalari beshligiga Yel (40,7 milliard dollar), Stenford (36,5 milliard dollar) va Prinston (34,1 milliard dollar) universitetlari ham kirdi. Ushbu reyting 1974 yildan beri har yili tuziladi, deb yozadi jurnal. Hammasi bo‘lib, reyting AQSHning 688 ta kollej va universitetini o‘z ichiga oladi.
