Rossiya o‘lim jazosini qaytarishi mumkin
Davlat Dumasi majlisida parlamentidagi ikki fraksiya yetakchilari Rossiyada o‘lim jazosiga qo‘yilgan moratoriyni bekor qilishga chaqirdi.
"Bugungi kunda bu terakt ishtirokchilari uchun o‘lim jazosidan boshqa jazo bo‘lishi mumkin emas", — deya taʼkidladi LDPR rahbari Leonid Sluskiy.
"O‘lim jazosini qayta tiklash uchun referendum o‘tkazish kerak, xalq o‘z xohish-irodasini bildirsin. Mening pozitsiyamga kelsak, bunday g‘ayriinsoniy harakatlarni amalga oshirganlar ularni qanday jazo kutayotganini bilishlari kerak", — deya fikr bildirdi "Adolatli Rossiya" partiyasi yetakchisi Sergey Mironov.
"Konstitutsiyamizda va Jinoyat kodeksimizda o‘lim jazosi bekor qilinmagan. Konstitutsiyaviy sudning qarori bor, unda o‘lim jazosini ijro etishga faqat moratoriy kiritilgan. Shuning uchun referendum o‘tkazishning hojati yo‘q, bu masala bo‘yicha Konstitutsiyaviy sudning qarori yetarli bo‘ladi. Konstitutsiyaviy sud qarori Yevropa Kengashi oldidagi xalqaro majburiyatlarni bajarish uchun qabul qilingan edi. Biz hozirda Yevropa Kengashi aʼzosi emasmiz. Shuning uchun bu mavzu muhokama qilinishi kerak", — deya munosabat bildirdi Davlat Dumasi spikeri Vyacheslav Volodin.
Dumaning Qonunchilik bo‘yicha qo‘mitasi rahbari Pavel Krashennikov Rossiyada o‘lim jazosiga ikkita — Konstitutsiyaviy sud va Prezident moratoriylari borligini eslatdi.
"Konstitutsiyaviy sudning qarori amaldagi qonunchilik va xalqaro huquqqa asoslangan", — deya qo‘shimcha qildi Krashennikov.
