Toshkentda 20 yoshli yigit lezviya bilan qornini kesib tashladi

Ijtimoiy tarmoqlarda Toshkent shahrida bir fuqaro o‘ziga-o‘zi tan jarohati yetkazganligi aks etgan video tarqalmoqda. Holat yuzasidan shahar IIBB rasmiy munosabat bildirildi.

 

Qayd etilishicha, 25 mart kechasi Chilonzor tumanida bir nechta fuqarolar o‘zaro janjallashib jamoat tartibini buzganligi haqida xabar kelib tushgan. Voqea joyiga zudlik bilan yetib borgan tuman IIO FMB xodimlari 7 nafar fuqaroni tinchlantirib, tegishli hujjatlarni rasmiylashtirish uchun yaqin oradagi IIBga borayotgan vaqtida ichki ishlar organlari xodimlarining qonuniy talabini bajarmasdan, ularga faol qarshilik ko‘rsatgan. Ushbu fuqarolarning ayrimlari nomaʼlum moddadan mastlik holatida bo‘lgan.

 

Holat yuzasidan fuqarolarga nisbatan O‘zbekiston Respublikasi Maʼmuriy javobgarlik to‘g‘risidagi kodeksning 183-moddasi ("Mayda bezorilik"), 194-moddasi bilan maʼmuriy bayonnoma rasmiylashtirilgan.

 

26 mart kuni ushbu fuqarolarni sudga olib borish uchun chaqirtirilgan vaqtda Chilonzor tumani IIO FMB hovlisida muqaddam Jinoyat kodeksining 277-moddasi bilan ikki marotaba sudlangan, Maʼmuriy javobgarlik to‘g‘risidagi kodeksning bir nechta moddalari bilan maʼmuriy javobgarlikka tortilgan 20 yoshli Sh. A. javobgarlikdan qutulish maqsadida namoyishkorona ko‘ylagini yechib og‘zida bo‘lgan piska (lezviya) bo‘lagi bilan qorin va qo‘l qismini yengil kesib o‘ziga o‘zi tan jarohati yetkazgan. IIO xodimlari tomonidan tezkorlik bilan ko‘rilgan choralar natijasida fuqarodan lezviya olib qo‘yilib, og‘ir oqibatlarning oldi olingan.

 

Sh. A. ga zudlik bilan birinchi yordam ko‘rsatilib, tibbiyot muassasasiga olib borilgan. Unga tibbiyot xodimlari tomonidan tibbiy yordam ko‘rsatilganidan so‘ng Sh. A. shu kunning o‘zida uyiga ketgan. Tibbiy maʼlumotga ko‘ra Sh. A. ga "Qorin old devorining kesilgan jarohatlari, chap qo‘l bilak sohasi kesilgan jarohati” tashxisi qo‘yilgan.

 

Fuqaro Sh. A. o‘ziga o‘zi tan jarohati yetkazganligi holati tuman prokuraturasi tomonidan o‘rganilmoqda.